Vertadièras falsas ofèrtas d’emplec

Gardacòs a Manaset

17 janvier 2015

Manaset recruta dos gardacòs (un òme e una femna) per son cap redactor e sos jornalistes. Bona condicion fisica. Necessitat d’un bon discernament per detectar los terroristas que, a Manaset, son los jornalistes que son cagolats e vestits de negre.

Perfils particulièrs :
– Òme : estudis superiors se possible, amb un interèst fòrt per la lenga, cultura e literatura occitanas. Capable de conversar, argumentar e ajudar las jornalistas dins lor trabalh redaccional e investigacional.
– Femna : gròssa peitrina.

Testaira de sex toys en cò de Macarel

30 novembre 2014

Macarel vòl completar sa gama de productes amb tot una selecction de joguets sexuals. Recruta una testaira a mièg temps. Diplòme : cap. Qualitats : dobèrtura d’esperit, adaptacion, sens del contacte. Una partida del trabalh se pòt faire a domicili. L’usatge de la lenga es facultatiu. Salari : convencion collectiva de la bagassariá.

Serviciau a la Tor deu Borrèu

15 novembre 2014

Qualitats : beròia presentacion, experiéncia sheis mes minimum dens un estanquet. Saber léger l’òra d’estiu com d’ivèrn. Saber conéisher un bearnés hart deu purmèr còp d’uelh. Un mut que seré acceptat per’amor d’esvitar lo fracatge nocturne. Salari : en liquide unicament.

Jornalista a Manaset

9 novembre 2014

Manaset recruta de jornalistas. Cap de diplòma en jornalisme nimai de nivèl en occitan son exigits que sèm mèstres del nòstre biais d’escriure e de nòstras causidas lingüisticas. Cap de remuneracion per un temps de trabalh equivalent a un temps plen. Competéncias : poder susportar un cap redactor dictatorial, de collègas a l’egò susdimensionat e de legeires sens umor. Pòste a provesir sulpic.

Regent en Calandreta a Monenh

2 novembre 2014

Calandreta que cerca un regent tà las classas primàrias de la soa escòla de Monenh. Diplòma demandat : Master. Experiéncia e formacion dens lo tribalh taus mainats exigits, un excellent nivèu de lenga qu’ei tanben necessari. Entà poder seguir los programas, lo candidat que deu tanben conéisher duas autas lengas vivas e mestrejar las coneishenças de basa dens las matèrias ensenhadas (istòria, geografia, matematicas). Que harà lo medish tribalh qu’un ensenhaire foncionari, mes tà un salari indexat suu SMIC. Pòste en CAE-CUI.

Cap-Redactor a La Setmana

19 octobre 2014

La Setmana que recruta un Cap-Redactor. Lo candidat que deverà mestrejar los sheis parlars principaus d’Occitània, que seré un mei si coneishèva tanben las lors diferentas sos-variantas. Que deverà aver un nivèu de lenga irreprochable e conéisher per còr tots los diccionaris occitans, entà poder escríver tres versions de cada article en foncion de l’orientacion lingüistica deus lectors. Pas nat diplòma en jornalisme ei exigit, mes un doctorat en psicologia que seré desirat tà la relacion dab los lectors. Lo Cap-Redactor que deu poder léger l’anglés, lo catalan, lo castelhan, l’italian, lo breton e lo còrse. Oraris : 50 òras per setmana. Salari : SMIC.