Vertadièras falsas ofèrtas d’emplec

Cap de projècte per Lo Congrès

13 octobre 2014

Lo Congrès Permanent de la Lenga Occitana cèrca un cap de projècte. Serà encargat de manejar lo conselh lingüistic. 35 oras per setmana, grasilha segon convencion  collectiva. Diplòmes exigits : nivèl B2 en occitan, dialècte indiferent. Doctorat de psicologia. La practica del iogà a nivèl expèrt o de la meditacion Zen seriá un demai.

Transportaire de mòbles en cò de Macarèl

7 octobre 2014

Emplec en CDD del 17 al 20 d’octobre. Competéncias : bicèps en estat de marcha, bona maissa per la salcissa. Saber manejar lo pincèl per las parets e la bròssa per lo patron. Aimar viatjar. D’efièit , los emplegats auràn de faire de desplaçaments bèls entre lo 420 e lo 450 de la carrièra Flemming. Lo trajècte retorn del 450 al 420 es pres en carga per l’entrepresa.
Mandar un CV complet e un certificat d’aptitude al maraton (qual pòt lo mai …).

Professor d’occitan caminaire

5 octobre 2014

L’Educacion Nacionala cèrca un professor d’occitan. Trabalharetz 15 oras per setmana sus tres collègis : Langonha, Castelnaudari e Le Vigan. 1056 € brut per mes, pas de fraisses de desplaçament. Diplòme exigit : licéncia d’occitan. Un bon classament coma pilòte dins una corsa automobila de resson nacional seriá un demai.

Tuaire de vacas a Montalban (82)

23 septembre 2014

La vila de Montalban recruta un (una) tuaire (tuaira) de vacas. L’emplegat deurà saber utilizar las armas de punh coma lo fusilh de caça. Un permís de pòrt d’arma seriá un demai. Cal mestrejar los diferents dialectes que las vacas son de raças lemosina, gascona o aubrac. Nivèl Cap o BEP de tuaire. Temps al 100 m : 11 s maximum. Emplec en CAE (56 oras per setmana pagadas 26). CDD de tres setmanas que poirà evoluir en CDI se lo candidat a una capacitat d’esper de las grandas.

Servici de l’emplec : anóncia n° 16855