Lo calendièr escolar 2015-2016 modificat a la demanda del sindicat del torisme montanhard

5 mars 2015  Economia, Ensenhament, Politica

Esquí

Lo govèrn modifica lo calendièr de las vacanças escolaras per s’adaptar a las condicions climaticas.

Coma l’a fait remarcar Laurent Fabius, lo torisme montanhard patís dempuèi d’annadas de vacanças de printemps tròp tardièras per faire lo plen, vist l’ennevament e doncas las reservacions. Lo calendièr a venir ne tendrà compte.

Avèm interrogat la ministra de l’educacion Nina Ballòt del Carcin sus aquel sicut : « A l’ora d’ara, los 8% los mai rics de la populacion que prenon de vacanças a la nèu son preses en ostage per la majoritat, e aquò es pas suportable. N’i a qu’acaban lors vacanças de prima lo 9 de mai, çò qu’es fòrça tròp tard per de bonas condicions d’ennevament. Lo governament va prene de mesuras.

D’en primièr, la prima s’acabarà d’ora enlà lo 30 d’abrial per daissar plaça a l’estiu . Aital, i aurà pas pus de vacanças de prima al mes de mai.

Lo calendièr escolar, el, serà tornar vist. Totas las vacanças se prendràn en tres zònas, e seràn melhor repartidas per poder emplenar corrèctament las logacions a la nèu.

Las vacanças de Nadal començaràn lo 2 de genièr per la zòna A per s’acabar lo 14 de febrièr per la zòna C.

Las vacanças d’ivèrn seràn repartidas entre lo 15 de febrièr e lo 28 de mars.

Las vacanças de prima entre lo 28 de mars e lo primièr de mai.

De mai, lo ministre del torisme poirà autrejar una setmana fluctuanta suplementària per las grandas vilas, Paris, Bordèu, Tolosa, Marselha e Lion se l’enneviament en decembre o en mai o necessita. Aquesta setmana serà recuperada en 24 oras efectuadas de diluns de ser repartits sus l’annada.

Lo governament es atentiu a las demandas dels professionals, e demandarà a de ritmedelenfantològs reconeguts d’aprobar aquesta reforma per rassegurar los parents ».

Manaset a lo regret de vos informar que, per causa d’enneviament important, lo trabalh de sos jornalistes, totes partits dins las estacions d’esqui, risca d’èsser perturbat pendent qualque temps.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *