Plega d’IEO Edicions de 2015

24 avril 2015  Cultura

Plega 2015

Coma cada an, lo responsable literatura de la redaccion de Manaset s’es procurat en abans-primièra la plega 2015 de l’IDECO.

Coma de costuma, quatre libres d’autors reconeguts trachan de lor subjècte favorit : l’ibronhariá. Ne vaquí un resumit exclusiu per nòstres legeires.

Joan Ganhaire, Chamin de Gòrja en Penda, A Tots N° 200 , 15 €

Enquesta plan malaisida pel cavista Tetadosilh. Clavat dins lo celièr de sos parents aprèp una ganarra polida, fai la rencontra d’un enològ que suert de set ans de licèu agricòl a ensajar d’elaborar un vin notat 20 / 20 al Parker. Dempuèi son fautulh se lança a la chercha del vertadièr melhor vin del monde.

Jaume Landièr, Los Bandats, A Tots N° 201 , 15 €

Los Bandats, aprèp quauques moninas dins lo país, van portar sa gargamela sens fons cap al nòrd. Còstas de Ròse, Beaujolais, Borgonha, Anjó, las fèstas seràn chucairas. Zinga-zanga, los Bandats agandiràn Hessa-Renana. Ai d’aqueles pintaires ! De curaires de barralhs !

Jòrdi Peladan, Marcèl o la botelha sus la taula, A Tots N° 202 , 15 €

Marcèl es un celibatari nimesenc. La jornada acabada, la cosina ven una cort de degustacion quand amb los companhs descobrisson una botelha voida pausada sus la taula. Istòria esfraiosa sus fons de proïbicion. Comprenon lèu qu’an lo sòrt de Maurici, joine Clapassenc, victime e presonièr d’una liga antialcoolica entre lors mans.

Romièg Jumèu, Paga qu’es tròp tard, A Tots N° 200 , 15 €

Aqueste monde es clafit d’ibronhas, non, de pintaires, chimaires, churlupaires mai d’òmes coma los autres qu’al moment de la barradura, ne vòlon totjorn una per la rota, que sa garganta vagueja segon una set inestancabla e sens fin.

Se pòt soscriure a la plega 2015 sul site de l’IDECO 45 euros franco de pòrt. Se pòt pagar en liquide.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *