La vertat suu Carnaval Biarnés

30 juin 2015  Cultura, Politica

Carnaval Biarnés

Lo Conselh d’administracion de l’associacion Carnaval Pantalonada qu’anonciè la soa decision de non pas organizar lo Carnaval Biarnés de 2016. Manaset qu’enquista.

Las rasons vertadèras, que las cau trobar a la comuna de Pau, au près deu Maire. Manaset qu’a encontrat Francis Veiron qui’u a explicat perqué e volé la fin de Carnaval

Purmèr, la Caça a l’ors n’ei pas mei possibla per’mor l’ors qu’ei ua espècia protegida. Lo maire que crenh ua reaccion deus ecologistas.

Dusaument, l’associacion n’a pas reglat la factura de las consomacions de l’equipa de Manaset qui èra en reportatge sus plaça e qui s’amonta a 39 997 euros.

Tresau rason : la ploja. L’equipa de Carnaval que causeish volontàriament los dias de ploja entà organizar las festivitats, çò qui obliga lo Maire a pagar lo son pòrtaparaploja en òras suplementàrias.

Enfin, rason géncer, dab la mort de Fernandel aqueste 30 de junh, Francis Veiron arreconeish que lo gost de l’arríder non e’u tornarà jamei.

Mes la cultura populara e lo divertiment que demoren au centre de las soas preocupacions. Carnaval que serà remplaçat l’an qui vien per ua hèsta interculturau, a la mòda, qui atire lo monde e de plan bon gost. En heurèr que’s harà a Pau la hèsta de la mongeta animada per Patrick Sébastien dab los sons convidats : Les Chevaliers du Fiel (entà l’accent), Alain Chamfort (entà la modernitat) e Julio Iglesias (entà l’interculturalitat).

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *