En voler hà’s amics, un neo-rurau que tua lo can deu son vesin

2 avril 2014  Societat

Husky

La cultura deus navèth arribats dens lo miei rurau qu’ei a còps problematica mes que pòt préner proporcions de las qui n’imaginam pas. L’exemple d’aqueste drame animau a Samadet que’n pòrta las pròbas. Qu’ei tota un país qui ei butada.

Jean-Marie Duponton n’ei pas un personatge hèra sociau mes qu’ei un òmi hart d’imaginacion. Aqueste neo-rurau originari de Melun e instalat despuish la soa retirada a Lacajunta (Lanas) qu’a avut ua idea de las grans entà simpatisar dab lo son vesin Thierry Capdecalhau. Aqueste qu’ei pair de familha deseparat de la soa hemna e qui a la guarda alternada d’ua petita Alienòr (5ans). Tot que comença lo dimars 1er d’abriu :

7ò30: Jean-Marie que sorteish de la soa casa e que deisha un tròç de carn a costat deu plèish enter las duas maisons.

7ò32: lo can deu vesin, aperat “Vodka” un joen husky siberian, que vien nhacar dens lo tròç de carn.

7ò32 e 15s mei tard: lo Jean-Marie qu’arriba dab un herrat pleat de gasolina e qu’aspergeish lo prauve canhòt qui’s muisha susprés e perplèxe.

8ò: Lo Jean-Marie que’s ditz que lo son plan ei infalhible. E que pensa que’n avertir lo quite ser lo son vesin en diser qu’un caminaire aja arrosat lo son can e poderé començar enter eths ua istòria d’amistat e de hidança de las beròjas. Oc, Jean-Marie qu’ei tòrt.

10ò: virèsse mau lo men ahar que’m poderí escóner en darrèr de l’excusa deu “peish d’abriu”, ce ditz lo Jean-Marie.

11ò30: Lo Thierry que torna deu tribalh mei vist que previst, que pren lo can e la soa hilha e que se’n van dinc a Samadet on viu la mair d’Alienòr: Isabèu Virabonet.

11ò35: Thierry qu’arroganha a votz hauta contra aqueth “saloper” de garagista pr’amor la soa autò que senteish enqüèra la gasolina…

11ò50: La familha que s’amassa a l’entorn de la taula tà hestejar l’aniversari d’Alienòr. Pr’amor òc, Alienòr que hesteja los sons 6 ans lo purmèr d’abriu.

12ò30: la mair de la petita landesa que pòrta ua còca tradicionau, hèita “a casa”, dab 6 candelas.

12ò31: arron la cançon costumèra desbarrassada de las versions anglofòna e espanhofòna, Alienòr que boha sus las candelas dab escaduda. De tira, Vodka que s’en.hueca e dens lo moviment de panica que hica lo huec a tot lo mobilier puish a las parets e fin finau au tèit.

12ò50: los pompiers d’Arsac (Bearn) qu’estupan lo huec de la maison.

13ò10: Isabèu Tornabonet que pòrta plenta contra lo son ancian marit.

13ò15: Ua cellula psychologica qu’ei obèrta entà la gojatòta.

13ò20: Thierry Capdecalhau qu’avia un processus d’auto-destruccion a basa de vodka.

A 18ò, lo Thierry qu’èra admés a las urgéncias e lo Jean-Marie Duponton qu’avè desapareishut. L’enterrament de Vodka que’s debanarà dijaus a 10ò.

Enric Pistolet

One Response to En voler hà’s amics, un neo-rurau que tua lo can deu son vesin

  1. Estela Arrosères says:

    Praube canhòt, quina tristessa, que’n poderí har ua cronica, mes qu’ei trop dur, quin eveniment sanglant.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *