Las sandalas Tong interditas en balèti

13 juillet 2015  Espòrt, Politica

Tongs

A la seguida d’un accident recent susvengut al cors d’una borrèia, lo parlament a adoptat una lèi pel mejan de l’article 49-3. L’aplicacion n’es immediata.

Ser de balèti ordinari a Florac dissabte. L’ambient es bon, digús se dobta pas que la serada va virar al drama. L’orquèstra ataca una borrèia de tres temps, ni mai ni mens rapida que de costuma. D’un còp, una dançaira lisa, s’arrapa a son partenari e totes dos cabussan, entrainant dins lor casuda lo coble que li fan fàcia. La borrèia d’a costat deurà a sos reflèxes segurs, aquesits dins los nombroses balètis qu’an frequentats, d’evitar l’accident.

Lo bilanç es pesuc : una cavilha folada, un parelh de bralhas nòvas esquissadas, una nhòca impressionanta al copet. Los secors intervenon rapidament, e son eles que descobriràn lo perqué del cossí : la vacancièra responsabla de l’accident portava de tòngs.

Lo legislator, davant lo dangièr, esquivarà pas sas responsabilitats e la nuèit seguenta, una lèi serà adoptada dins l’urgéncia, per recors al 49-3.

Aquesta precisa que « dins un balèti dobèrt al public , los dançaires an obligacion de portar caussaduras que sián tengudas al nivèl del pè .» Tot contravenent s’expausa a un verbal de 90 èuros e a l’expulsion immediata.

One Response to Las sandalas Tong interditas en balèti

  1. jandrau says:

    Te trufas, aquí ?

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *