Estivada e Escòla Occitana d’Estiu : cap a una solucion ?

9 septembre 2015  Cultura

Conferéncias a l'Estivada

A la seguida de las dificultats pertocant las doas associacions, lors responsables an anonciat davant la premsa la fusion de las estructuras.

L’associacion novèla se dirà «l’Estivada d’Estiu ». Vaqui la presentacion del projècte que foguèt faita :

« La fusion es venguda necita vist que nos sèm trachat que de mai en mai de mond frequentavan a l’encòp l’Escòla e l’Estivada. Pensam doncas, per reduire tant los còstes coma l’emprenta energetica, de faire pas qu’un eveniment que regroparà los dos.

Perfin de renovelar lo còr de cibla costumièr, prepausarem lo matin de corses de lenga occitana en mai d’un dialèctes especialament adaptats al public dels concèrts, amb son lexic e sa gestuala particulièra.

L’aprèp dinnar, una iniciacion a la consomacion accelerada de bièra a la pinta se farà pels legeires de literatura occitana, amb d’especialistas bèlgas e alemands, mercé al sosten d’un fons cultural europèu.

A partir de 21 oras, de conferéncias e taulas redondas se tendràn sus l’empont bèl a prepaus de la musica punk, la scèna electrò e lo ròc-metal.

Los dançaires seràn pas doblidats amb dos talhièrs : fabricacion d’escassas e iniciacion a la brassa parpalhon.
De grops de musica son çaquelà previstes, per assegurar lo fons sonòr dels debats politics que sèm a programar.
Enfin, a partir de mièja nuèit, los enfants de las calandretas se veiràn prepausar d’activitats manualas a partir de material escampat recuperat dins la jornada.

Un talhièr de cants funèbres se debanarà al moment de l’aperitiu, previst en debuta de matinada per ganhar de temps pel repais.

Las associacions occitanas seràn convidadas a animar per lors discutidas las fortificacions Vauban del vilatge vesin.
L’informacion e la comunicacion seràn asseguradas per Manaset, per una chifra encara desconeguda mas que las previsions mai bassas despassan ja çò que podètz imaginar.

Enfin, un espaci buveta restauracion especialitats localas es previst, assegurat per la societat Eusobras.
La data e lo luòc son pas encara completament fixats, quitament se podèm dire que la primièra edicion de l’Estivada d’Estiu se va probablament tenir en estiu.

L’associacion dels nòstre saber-far e la modernizacion dels dos concèptes pòt pas que portar la capitada. »

Fòto : Mediatèca occitana

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *