Un atemptat evitat de justesa a l’universitat Paul Valeri

24 août 2015  Ensenhament, Lenga, Societat

Universitat Paul Valéry

Un terrorista plan preparat e decidit es estat mestrejat al moment de cometre son atemptat, mercé al coratge de dos estudiants del MEBOC.

Es en plen amfi, al moment d’un cors sus la literatura occitana del sègle 20, que lo terrorista se levèt per perpetrar son malfait. Urosament, dos estudiants del Meboc, desrevelhats per un còp, ausiguèron lo malfactor que repetava a votz baissa « degunalitat degunalitat ». Son intencion èra segurament de getar aquesta panoccitanitat a las aurelhas dels paures estudiants occitans, que la risca de traumatisme es grandarassa, sens parlar dels professors presents dins la sala.

Escotant pas que lor coratge, sens prene lo temps de se botar de bolas Quiès, los dos estudiants se getèron sul terrorista presumit per lo balhonar. Un d’eles prenguèt un punt d’entergason perdut dins l’aurelha esquèrra mas son audicion es pas en dangièr.

Un omenatge es estat rendut al coratge dels dos estudiants al local del Meboc a l’entorn d’un barral de Faugères. Lo ministre delegat a la lenga occitana alprèp del ministre de la cultura lor remetèt oficialament una crotz d’aur ofèrta per la societat Racamèl.

Foguèt l’ocasion de tornar dire que la vigilància mai granda deu èsser de rigor per evitar los atemptats lingüistics, que la risca es maximala en aquestes tempses que se parla de ratificar la Carta Europèa de las Lengas.

Fòto : Vpe

2 Responses to Un atemptat evitat de justesa a l’universitat Paul Valeri

  1. Jacme says:

    Dempuèi l’universitat a clavat las pòrtas (fòto) e tanben los enregistraments al cors de literatura modèrna ; la rason donada : «es devengut dangierós pels febrinèls-as regents-as de naut nivèl intellectual de contunhar en patz sonòra coma abans.»

  2. Pascau says:

    Segon Jornalàs.fr, lo terrorista èra « un asiatic en estament primotat ».

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *