Lo carnaval Biarnés se farà en 2016

19 septembre 2015  Cultura

Sent Pançard e feca

En descobrent las dificultats d’organizacion rencontradas per l’equipa navèra, lo Comitat deu Carnaval de Limós qu’a decidit, per solidaritat, d’arcuélher augan dens la soa vila lo Carnaval de Pau.

Com lo Carnaval de Limós ei lo mei long deu monde, la decision qu’estó viste presa : augmentar de quate dias la durada deu Carnaval 2016 entà arcuélher lo son omològue paulin, e aquò tant que las dificultats sus plaça ne seràn pas resolvudas.

« Entà aungan, explica Maurici Bauloin, un servici de bus que miarà los organizators, los actors e los espectators de la plaça de Verdun de Pau a la plaça de la Republica de Limós enlà.

Entà 2017, la linha LGV Pau – Limós, dont las òbras e començaràn en octobre, que deveré estar en foncionament. Lo maire de Pau qu’a prometut qu’intervieneré en aqueth sens. Aquò que hicaré la vilòta audenca a solament ua òra tres quarts de Pau. Que serà possible de har l’anar tornar cada dia, o de dromir devath las arcadas taus qui an paur de la fatiga.

En tot cas, que mercejam los collègas d’Aude, e qu’èm segurs que Sent Pançard e s’aclimatarà dens la Vath d’Aude. Qu’avem previst de portar barricas de Jurançon entà’u confrontar a la blanqueta pendent ua serada especiau. »

Daubuns que regretan que lo Carnaval Biarnés ne’s hasqui pas mei a Pau, mes la màger part deu monde e’s regaudeishen de l’aprochament dus dus carnavals mei importants d’Occitania.

Fòto : Paraulas en Òc

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *