« La lenga tà tots » que crida la soa colèra

3 avril 2014  Ensenhament, Politica, Societat

Manifestacion a Tolosa

Dimenge passat, ua manifestacion deu movement « La lenga tà tots » qu’amassè milèrs de personas hens las carrèras de Tolosa. Que protestèn contra la l’eleccion de candidats « Bastir » a las municipaus e contra la Teoria deu bilingüisme.

« L’arribada hens las municipalitats de candidats qui sostienen la Teoria deu bilingüisme qu’ei ua miaça tà la democracia », digó lo pòrtavotz de « La lenga tà tots » a Manaset. « Que demandam que la lei suu maridatge enter francofònes e occitanofònes e sia abrogada de tira », ajustè.

Que brembam que tau movement, lo maridatge mixte « suprimeish legalament l’alteritat lingüistica » e « remet en causa lo fondament de l’identitat umana : lo monolingüisme ». L’eleccion de membres de « Bastir » hens mantuas comunas qu’ei tad eths ua « provocacion a la laïcitat » e « un dangèr tà l’imatge de la familha tradicionau ».

« Aqueths elejuts que sostienen l’ensenhament de l’occitan hens las escòlas. Que coneishem lo risc d’ua tau decision : har vàder los mainats bilingües », expliquè lo pòrtavotz. « La Teoria deu bilingüisme, qui ditz qu’un mainat pòt estar sia francofòne, sia occitanofòne, sia los dus, sia ni l’un ni l’aute, qu’ei ua invencion dangerosa. Aquera nocion fosca e pas briga scientifica que mia a la remesa en causa de las identitas lingüisticas. Ne podem pas deishar ua tau idea hens lo cap deus nostes mainats ».

Los manifestants que hasón un passacarrèra de la plaça Sant Ciprian au Capitòli enlà. Aciu, que bloquèn la circulacion en cridar : « Bastir ! Hè’t enlà ! ». L’arribada de la Polícia Occitana de Proximitat que marquè la fin de la manifestacion.

One Response to « La lenga tà tots » que crida la soa colèra

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *