La marca LEGO® ataca l’OPLO en justícia

17 novembre 2015  Lenga

Duplo

Es una nòva venguda del monde judiciari que marquèt la suspresa e la naissença del tot novèl OPLO.

De fach, aqueste matin foguèt portada al grafi del tribunal de Tolosa una denóncia per « Contrafaiçon, violacion del còdi de la proprietat intellectuala e concurréncia desleiala » pels avocats franceses de la famosa marca de joguets de construccion danesa LEGO®.

Lo representant de LEGO® en França, M. Fòradesen, interrogat a la sortida del tribunal per Manaset, nos expliquèt :
« Foguèrem alertats primièr per l’omonimia entre aqueste OPLO e nòstra gama DUPLO®. En ensajant de n’aprene mai sus aqueste afar, vegèrem l’OPLO èra una joguina, un jòc de construccion grossièr, amb un sistèmi de peças desparièras, e plan malaisat d’engolir. Tant de causas que se tòrnan trobar dempuèi 1969 dins los DUPLO®, nòstra gama LEGO® pels pichonèls, al succès que demesiguèt pas amb las annadas. Venguèt clar per nosautres qu’èra una contrafaiçon del nòstre trabalh e de tota la marca, amb una volontat d’enganar lo public jove, çò que podiam pas umanament daissar passar. »

Jonch per telefòne, David Gròsjoan, president novelament elegit de l’OPLO, se volguèt pas exprimir sus l’afar.

Seguirem evidentament las seguidas judiciàrias de la batèsta en exclusivitat per Manaset.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *