Farà Sant-Miquèu l’Olimpic de Marselha !

5 avril 2014  Espòrt

OM

La comuna dau Ròve faguèt una prepausicion que lo club focèu non deuriá refusar.

La perspectiva de l’alargament de l’Estadi Velodròm a 67000 plaças e l’enaussament dau loguier previst per la comuna de Marselha faguèt prene una decision istorica au club marselhés.

« Davans lei mejans gigantassàs de clubs coma lo Paris-SG ou l’AS Monaco que podem pas luchar còntra, avèm fach la causida de faire mudar l’OM en pichòt club de quartier. Lo trabalh sus lei resultas es estat ja ben entamenat, amb una equipa que s’arresta pas de perdre de partidas e de plaças au classament de la Liga 1. Avèm recrutat un « staff » tecnic totalament incompetent au nivèu professionau e que conoisse ben lei divisions inferioras per posquer l’an que ven començar d’envisatjar seriosament una davalada en Liga 2 puei, perqué pas, agantar lo National, ò mièlhs encara la CFA a l’orizon 2017 », nos diguèt l’entrainaire / Director esportiu / Marabot / brancardier de l’OM, Josèu Anigo.

« L’estapa venenta serà de juegar dins un estadi a la nòstra mesura, es per aquò que la prepausicion de la comuna dau Ròve es encuei estudiada seriosament per nòstrei servicis de non desvolopament dau club ».

« Lo simbèu dau Ròve, son sei cabras », nos ramenta lo cònsol de la pichòta ciutat dau nòrd de Marselha. « Mai fau sacher que son a mand de desparéisser », aponde. « Se siam pensat que seriá quauquaren de remirable de posquer aculir un novèu tropèu au nòstre, amb la perspectiva de l’ajudar a se manténer dins una quietat qu’aprofiecha en totei ».

L’Olimpic dau Ròve e sei cabras, afar de seguir per posquer se regalar lèu d’espectaclós derby amb lei vesins dau FC Còsta Blava ou lo Joventut Armèni de Sant Antòni !

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *