Una boha en gara del Mont entraïna una crisi d’isteria murtrièra

6 avril 2014  Cultura, Societat

Boha

Aquò partissiá pertant d’una bona idèia, aquela de Garas & Conneccions, filiala de la SNCF qu’installèt dins un detzenat de garas en França de pianòs, a la liura dispausicion del public, que siá meloman confirmat o començant. Al Mont, la musica foguèt malastrosament un pauc diferenta.

Decebut que sa gara demorès de sòbra, pas jutjada pro bèla, lo director de l’estacion del Mont de Marsan prenguèt d’el-meteis l’inciativa de far installar dins lo hall de sa gara un instrument, per que lo monde ne poscan jogar e aital calmar l’ànsia provocada per de trens totjorn mai en retard, quora son pas tot simplament annulats.

Sociós d’aderir a la cultura locala, qu’es tanben la sèuna, lo director botèt donc entre doás ponchonusas una cornamusa tipica de las Lanas, ont es sonada « boha ».

L’efièch foguèt quasi immediat e irreversible : tre lo primièr jogaire improvisat, los portanèls de la gara foguèron sabrondats de gents e de reclamacions. Los empleiats de la SNCF, en reduccion d’efectiu al Mont, posquèron pas respondre còp-sec a totas las damandas, çò que provoquèt una crisi de folia collectiva.

La polícia, arribada tròp tard suls luòcs del drama, relevèron cinc mòrts per suicidi, dont tres personas  getadas jos un trin e doás dins un transformator electric, sèt nafrats en seguida d’actes suicidaris abortats, mas tanben un vintenat de timpans crebats.

Mas es lo paure Augustin Darèl, 21 ans, plan conegut del mitan festaire del Mont, que paguèt lo mai car tribut per aquesta iniciativa malvenguda, puèi que, sonaire efemèr de la boha colpabla, foguèt veritablament linchat per una populaça embriagada de furor. Defuntèt de sas feridas pendent son transpòrt a l’espital.

Lo director de la gara dèu lèu comparéisser per mesa en dangièr de la vita d’autrú, omicidi involontari e possession d’arma de seconda categoria sens autorizacion.

La boha foguèt, d’ela, retrobada esventrada un pauc mai tard dins lo tren de Pau, e nòstres lectors nos perdonaràn de sortir de nòstra abituala resèrva jornalistica per dire qu’es quand mema justícia.

One Response to Una boha en gara del Mont entraïna una crisi d’isteria murtrièra

  1. ESPINASSE says:

    Un jorn serà la revenja deu bohaire mascat, e alavetz lo monde serà aus sons pès !
    Lo bohaire mascat.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *