Lo Fitness-balèti, lo novèl espòrt que fa furor !

8 avril 2014  Cultura, Espòrt

Dançaires

Lo club Los Bolegaires de Narbona a lançat un novèl espòrt per gardar la linha. En mens d’una setmana, an recebut mai de 150 inscripcions.

Al programa, step-rondèu, escotich ritmica, cardio-borrèia e cercle-aerobic. Los esportius dels Bolegaires, jos la susvelhança de Suzette Faquin, son prèstes a tot per aver de polits culals. Cada setmana, se venon entraïnar al Fitness-balèti al Palais del trabalh de Narbona.

« Fa d’annadas qu’i pensavi », fisèt Suzette Faquin a Manaset. « La mòda uèi es de far d’exercici per gardar la linha. E perqué pas introduire la tradicion dins aquela mira onorabla ? ». Amb qualques amics musicians, lancèt doncas lo concèpte.

« La borrèia es excellenta pels pompilhs, la capelesa muscla los braces e lo branlon te fa un cuol d’infèrn ! », explica aquela professionala del subjècte. Es estada estabosida per la capitada de son entrepresa. Sonque una setmana après aver dobèrt son club, comptava ja 150 inscrits.

« Es al delà de tot çò que podiam esperar », se regaudís. Desiram doncas als Bolegaires que lor tot novèl espòrt contunhe sa volada.

One Response to Lo Fitness-balèti, lo novèl espòrt que fa furor !

  1. Isa says:

    Per contra, quant lo 3en atge de Narbona ven a los nostres baletis en miegorn pireneus, lor cal dire de se rasar los pels jos los braç perque i marcham dessus!

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *