Atemptat dabant ua escòla Calandreta, la FELCO que denega

6 avril 2014  Ensenhament, Societat

Calandreta d'Artix

La branca armada de la FELCO denega tota implicacion dens l’atemptat a la bomba dabant l’escòla Calandreta d’Artics (Bearn) d’aqueste matin.

La Jana-Maria Verny, secretària generau de la FELCO, qu’ei la cibla privilegiada de la premsa despuish mieidia e l’anoncia d’un atemptat a la bomba mancat dabant la Calandreta d’Artics a 10h32. Se los autors d’aquera ataca viva ne son pas coneishuts, quauques noms que circulan e lo comandò JMV qu’ei en purmèra linha suu banc deus acusats.

Qu’avem podut gahar quauquas responsas a las nostas questions au parat d’un meeting-conferéncia de Dauna Verny:

Manaset : Dauna Verny, quauques observators deu terrorisme dens la provincias francesas qu’acusan lo comandò JMV d’estar a l’origina d’aquesta ataca. Que’n pensatz?
J-M Verny : B’ei ridicule! Estossi d’aqueste comandò que portarí lo clam per difamacion. N’i a pas nat pròba […] e au nom de la FELCO que denegui tota implicacion de la mea organisacion dens aqueth ahar.

Manaset : Dauna Verny, e’ns podetz díser quaus son los ligams qui existeishen enter la FELCO e lo comandò JMV?
J-M.Verny : N’i a pas nat ligam. Tot açò que relhèva deu fantasme. La FELCO qu’ei un moviment pacific, republican e … republican.

Manaset : Qui a podut har açò au vòste avís?
J-M Verny : N’ac sèi pas mes que compreni l’esmalicia deus qui an miats aquera operacion. A fòrça de formar los joens contra la santa Republica Francesa qui’u finança, lo moviment Calandreta que’s hè mei anar mei d’enemics. Alavetz ne’s cau pas estonar se i a bons ciutadans de qui prenin un fusilh o qui hascan sautar ua bomba. Que serà tot tà uei… Vive la France et vive la FELCO!”

De notar que l’atemptat ne hasó pas nat alebat ni nat mòrt: la bomba qui estó plaçada dens lo camion d’avitalhament de la cantina que petè dens lo quite camion cargat de grans de sòja e de quinoà abans d’entrar dens l’escòla.

Especialistes que ns’an contat qu’èra la mesclanha enter aquestas duas espècias de vegetaus qui provoquè l’explosion iniciau.

La tension que risca de pujar enqüèra en fin de setmana dab la responsa deu moviment Calandreta qui s’ei balhat 146 òras d’amassada colectiva abans de decidir de çò qui diràn.

Enric Pistolet

3 Responses to Atemptat dabant ua escòla Calandreta, la FELCO que denega

  1. Super ! I calia pensar ! Meti còp-sec sus ma pagina facebook ! Fai de ben, l’umor, per aqueles temps de fascisme rampant…

  2. Felip Martèl says:

    Comunicat de la direccion de la FELCO (o HELCO se preferatz).
    La direccion suprema de la FELCO acampada en consistori en son seti social (Montsegur cedex 39) a votat a l’unanimetat e quauques votz contra l’exclusion de Joana-Maria Verny, aital, perde qué nos a semblat una bona idèia sul moment.
    La FELCO se declara non-responsabla dels deutes contractats per JM V prochi Lehmans brothers e Madoff inc. Per contra, seria desitjosa de recuperar lo codi d’accès al compte de las illas caïman.
    La FELCO demanda a JM Verny de restituir, o restituar, segon lo cas, la BMW de fonccion que li èra estada fisada. De preferéncia amb lo plen de gasolina, e los papiers del veïcul.
    La proposicion un brison extremista d’eliminar fisicament e de manjar JMV e quauques membres eminents de la FELCO, per far un pauc de plaça dins lo local, es estada provisoriament rebutjada per lo consistori, al nom de nostras valors fondamentalas, Pretz, Paratge, Convivéncia, Caçolet e pedagogia.

  3. HilhDePuta says:

    e de qué ne pensan lo Front (nacional) d’esquèrra d’Artics e los amics del POC-Bastir !?!

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *