La darrièra fabrica artesanala de confètis menaçada de barradura a Limós 

11 avril 2014  Economia

Carnaval de Limós

La nòrma novèla AFNOR NF EN 71-3 risca d’èsser fatala a la darrièra entrepresa de confètis limoxina. D’efièit, Euròpa a renforçat recentament l’aplicacion de las nòmas, exigent de tèstes per cada article de divertiment vendut dins la Comunautat.

Aquela novèla nòrma pausa un problèma dels grands a la fabrica de confètis de Limós, que cada confèti, descopat al cisèl manualament, es un article unenc. Cal doncas testar cada confèti, çò que fa pujar de tròp lo còst del dit tèst. Benlèu que la familha Delprat, fabricants de confètis dempuèi quatre generacions, seràn menats a arrèstar lor activitat.

« Es una vergonha, çò explica Jòrdi, l’ainat dels fils Delprat. Aquela nòrma empacha pas los productes chineses, mal fotuts e dangieroses, de se trapar dins las biaças d’unes carnavalièrs. e nautres sèm escanats per de leis que venon de Bruxelas ! »

La fabrica compta sièis obrièrs nautament qualificats que descopan de confètis dempuèi tojorn. Un torn de man, o puslèu de cisèl, que s’apren sul tas per la practica. « Es mon paire que m’aprenguèt pichon a descopar lo papièr per ne far de confètis. A sètze ans, dintrèri al talhièr per me perfeccionar. A vint ans, èri lo mai jove confetièr de França, conta Eusèbia ». Los obrièrs comprenon pas l’acarniment de Bruxelas, e son prèstes a se defendre.

« A Limous, avèn lé solél de maï, çò marmolha Josèp, delegat sindical, que parla pas que lo patoès Limoxin. Mas avèn tabés la sanc del papéto. La man nous prusitz ! »

Marineta, ela tanben encolerada, nos explica : « L’autre jorn, ma filha crompèt de confètis chinés. Èran descopats dins de papièr reciclat dins de magazinas. Aquò te fasiá de confètis tròp durs que nafravan los mainatges. Son aquò las nòrmas de securitat ? Mentre que los confètis vertadièrs de Limós son faits exclusivament amb de papièr recuperat dins las paginas Limós e Nauta Val d’Aude de La Despacha e l’Independent. »

Semblariá qu’una possibilitat existiga, seriá de considerar aqueles confètis coma d’elements de decoracion de las carrièras e dels trepadors, e non pas coma de productes de divertiment. Aital, escaparián a tota nòrma. Per los sièis darrièrs confetièrs limoxins, es l’esper ultim per escapar al caumatge, dins una vila durament afectada per la desindustrializacion.

Una sortida de fecos serà organizada sus la Plaça de la Republica en  solidaritat amb los confetièrs lo dimenge 27 d’abrial. En signe de protèsta, aquela sortida se farà dins lo sens reborsièr, es a dire que los fecos viraran jos las arcadas dins lo sens contrari a las aguhas de la mòstra.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *