La capitada professionala per totes

11 avril 2014  Economia, Societat

Naïa

Manaset a rescontrat una jova de 23 ans que ven de signar un CDI directament a la sortida de sa licéncia d’occitan.

Naïa desmontra plan que la precaritat tòca pas tant qu’aquò lo mond diplomat e que se pòt trapar un emplec fixe tre la sortida de la facultat. Una tòca d’optimisme dins un mond del trabalh plan negre :

Manaset : Nos podetz contar vòstre parcors ?
Naïa : Aprep lo licèu me pausavi de questions. Veniái de passar tres ans en filièra literària opcion economia. Aimavi lo contacte amb lo mond, ajudar a la mendra escasença e lo mond de l’entrepresa. Me soi virada cap a la conselhièra d’orentacion, avem charrat pendent d’oradas e me diguèt fin finala d’anar a l’universitat seguir la licéncia d’occitan. M’agradèt fòrça, qu’es una licéncia fòrça completa e poguèri rescontrar fòrça monde que la facultat a las pòrtas de mai en mai dubèrtas. Ai decidit de passar mon master puèi a la sortida comencèri directament a trabalhar.

Manaset : Justament, nos pòdes dire en de que consistis lo vòstre emplec ?
Naïa : Soi consultanta per una multinacionala que ne pòdi pas dire lo nom. Trabalhi en tota objectivitat per ajudar l’entrepresa. Balhi de conselhs de gestion, d’estrategia, de manajament e tanben tòqui al domèni de las ressorgas umanas. Es un emplec complet, es per aquò que trantalhèri pas de signar mon CDI tre la sortida de mos estudis.

Manaset : Cossi vos ajudèt vòstre percors per arribar fins aquí ?
Naïa : Lo master es un astre, es un diplòma plan reconeissut e valorisat, aquí aviái ja una longor d’avança. L’occitan foguèt un atot, me permetèt de tastar mas riquesas d’una lenga de cultura nauta, de comprener los enjòcs contemporanèus de la diversitat. Coneissi ara las fondacions culturalas de las valors de l’ora d’ara e me soi dubèrta a la diversitat culturala de l’espaci mediterranenc, ai pas paur d’anar trabalhar amb los païses africans tant coma asiatics o americans. Ai tornat nosar lo dialog amb mos ainats e pòdi trasmetre mas coneissenças als mai joves, soi dubèrta a totas las generacions. Pòdi tanben compréner e apréner totas las lengas romanicas. Me pensi qu’es tot aquò qu’es atractiu per las entrepresas. Son a la recèrca de mond aital e nos sentissèm esperats a la sortida de la facultat.

Manaset : Fa plaser de sentir la joinessa trabalhadoira, avètz de conselhs per la generacion qu’arriba sul mercat del trabalh ?
Naïa : Dirai que cal simplament plan estudiar dins la filièra ont nos plaçan e que lo trabalh espèra los motivats e… Me desencusi qu’ai lo 4*4 en dobla fila e que devi tornar a l’ostal preparar lo repais de mon òme que va dintrar.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *