Rescontra son fraire mercés a una pana d’electricitat

13 avril 2014  Societat

Mickaël Pemontan

Una copadura d’electricitat a permés a un jove marselhés de quitar son ordenador pendent una mièja-ora, pendent la quala a crosat son jove fraire de dos ans.

Mickaël Pemontan a descobèrt League of Legends (LoL) en 2011. Aquel léser a lèu pres lo pas sus totas sas autras activitats e es vengut çò que se sona un « no-life ». Embarrat dins sa cambra, ne sortissiá sonque la nuèit per s’avitalhar al frigò, emplenar una botelha e ne vuejar una autra.

Joshua Pemontan es nascut a la debuta de 2012. E ièr, a 18h, Mickaël l’a vist pel primièr còp. Es un vertadièr còp d’astre se los dos fraires se son poscuts atal rencontrar. D’efièit al matin, pas res daissava presatjar aquel eveniment.

Coma de costuma, Mickaël s’es levat a 15h, qu’aviá combatut d’invocators fins a 6h del matin. Son primièr gèst, solide, foguèt de sortir l’ordenador de sa velha. Après aver verificat los forums de jòcs e lançat mumble, per se plan desrevelhar, tornèt lançar LoL.

Semblava que, coma de costuma, anava demorar sietat fins a sa pausa de mièjanuèit. Mas un eveniment imprevist venguèt tremolar l’òrdre de sa jornada. A 14h45, d’efièit, una pana d’electricitat copèt sas activitats.

Après aver passat un quart d’ora a romegar e a damnejar, sortiguèt de sa cambra per ensajar de restablir lo corrent. Dins lo salon, veguèt un nenet que coneissiá pas. Sos parents lo li presentèron coma son fraire Joshua.

Es atal que los disfoncionaments d’EDF an causat un vertadièr bonur a aquela fratria que seriá benlèu demorada desseparada pendent encara d’annadas.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *