Lo Tolosa-Marselha de 12h54 es partit a l’ora

15 avril 2014  Societat

Teoz

Es una primièra dins l’istòria de la SNCF. Lo Tolosa-Marselha, partença inicialament prevista a 12h54, es partit a l’ora… e arribat a l’ora tanben.

Los acostumats de la linha se’n remembraràn pendent d’annadas. « Es un eveniment que se vei sonque un còp dins una vida », commentèt Claude Retmin, usatgièr regular. « Quand o contarai a mos amics, o volràn pas jamai creire », ditz una autra passatgièra.

E d’efièit, es de jamai vist. L’interciutat qu’assegura la ligason entre las doas capitalas occitanas partís de costuma amb mièja-ora de retard, levat en cas de grèva o d’òbras sus las vias ont pòt far esperar lo mond pendent almens una ora.

E lo dimècres 9 d’abrial, pel primièr còp, dintrèt en gara a 12h50. « Èrem totes fòrça suspreses », conta Claude Retmin. « Recaptèrem nòstres afars a la lèsta, de mond arribèt en corrent dempuèi lo hall… Pas degun s’esperava a partir tan d’ora ».

« Es estat tarrible ! Ai pas agut lo temps de me crompar las cigarretas ni de jogar de pianò. M’a calgut anar sul cai al brutle per poder montar dins lo trin. L’ai quitament mancat ! », explica Francés Vapola.

Mantuns autres passatgièrs an pas agut aquel astre e son arribats dètz minutas après la partança del trin. D’unes son anats portar lo clam contra la SNCF per « Avança de trin injustificada ».

One Response to Lo Tolosa-Marselha de 12h54 es partit a l’ora

  1. Felip Martèl says:

    Es efectivament un eveniment totalament fora norma. Penso que fai partia d’aquestos presagis divers e inquietants (terra-tremols, baissa dau pretz dau diesel e dau caviar, reaparicion dau short en aquo de las filhas…) qu’anoncian la fin dau mond per lo 6 de junh 2014 a 12 o 54 e 14 segondas. Repentetz-vos !

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *