Escandale autorn de la Miss’Becut

16 avril 2014  Cultura

Miss'Becut

Los auditors de Good Morning Occitània qu’estón trucats quan aprenón que Miss’Becut, la presentatritz meteo de l’emission, avè pausat per de fòtos de charme.

« Qu’ei ua vergonha, n’escotarei pas mei aquera emission », que digó Pèir d’Escanacraba, qui segueish cada dia Good Morning Occitània sus Ràdio País. En efèit, que vienè d’apréner, coms mantuns auditors, lo passat escandalós de Miss’Becut.

Que’n hè pas mei mestièr de presentar Miss’Becut, la presentatritz meteo coneishuda hens tota Occitània. La soa votz que’vs hè saunejar cada matin. Mes adara, lo saunei qu’ei esbrigalhat. En efèit, lo Jornalet que publiquè ger fòtos de la Miss drin especiaus.

Los imatges que datan de 2010 e qu’amuishan la presentatritz qui pòrta ua tienguda e qui pren ua pausa qui ne dèishen pas d’equivòca. La revelacion deu passat escandalós de Miss’Becut qu’a solide suslhevat ua mareja de suspresa e d’indignacion.

« Qu’èra la mèa estar », que ditz Florença, 10 ans, quasi en plorar. « Adara ne sabi pas pus qué pensar… »

Mes « l’estar » qu’a dat explicacions. « Qu’estói obligada de har aqueth tribalh vergonhós entà’m pagar lo DEM [NDR:diplòma d’estudis musicaus] », que’s defendè au parat d’ua conferéncia de premsa. Mes aquera explicacion e serà pro entà esfaçar la decepcion de milierats de fans ?

One Response to Escandale autorn de la Miss’Becut

  1. ESPINASSE says:

    la miseria estudiantina occitana, e sustot musicaira, ací l’escandale vertadièr ! La region Aquitània a de balhar borsas a las miss meteo occitanas !

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *