Lo Dirçoc commemòra Mistral

21 avril 2014  Cultura

Occitanique

Per l’annada de commemoracion de la mòrt de l’escrivan lexicograf Malhanés, lo Dirçòc, ifonotèca® nacionala occitana potarà sa pèira e l’edifici.

Avèm rescontrat son Director-Conservator-Administrator-Ieufautor lo Sénher Caganís Çayest.

Manaset : Caganís, qu’avètz previst coma trabalh en tecnologias de l’informacion e de la comunicacion sus l’òbra de Mistral?
Caganís Çayest : Avèm un trabalh dels gròs; totas nòstras equipas son mobilizadas nuèit e jorn que lo pretzfait es grandaràs: resumir lo TDF en dos Tweets, siá 140 caractèrs. Çò fasent, metrem a dispausicion dels joves occitans una aisina modèrna e actuala.

M: Interessant. D’autres projèctes ?
CC: Òc. Volèm prepausar sul site Occitanique totas las cançons del trobador Guiraut Riquier jos la forma de sonariás de telefonilhet.

M: Segur qu’aquò agradarà als joves. Mas qu’anatz faire dels libres que son estocats dins los locals del Dirçoc?
CC: Qué ?? A ! Los libres. Aquò interessa pas los joves, i pas que los occitanistas vièlhs que legisson encara de libres. L’avenidor es l’Ifòn®, l’Ipad®, quitament los utilizaires d’ordenador, per ieu, son de dinosaures.

M: Alara, los libres, que van devenir?
CC: Avèm començat de n’escampar un molon que nos caliá de plaça.

M: Per qué faire?
CC: Una partida de la plaça ganhada servís per rengar las tengudas de las Dirçoquetas.

M: Las qué?
CC: Las Dirçoquetas. Son aquelas dròllas que vesètz dins totes los eveniments occitans faire la promocion del Dirçòc amb de tengudas diferentas cada jorn.

M: E lo demai de la plaça?
CC: Aquò es per metre de costat l’argent de las subvencions que dintran a rajòls e qu’es impossible de las despensar totas.

M: De bruches circulan que lo bastiment del Dirçoc va portar un nom de personalitat coma la mediatèca André Malraux.
CC: Òc, avèm pensat a ifonotèca® Raimon Trencavel.

M: Nos podètz desvelar lo programa d’animacions a venir?
CC: Non pas que deu demorar secret. Vos pòdi fisar quicòm se demòra entre nautres: Les Bombes de Bal faràn pas partida d’aquesta programacion.

One Response to Lo Dirçoc commemòra Mistral

  1. Benjamin says:

    Pareis que lo director-conservator-administrator-ieufautot del Dirçoc farà la virada de las plajas aqueste estiu amb sas dirçoquètas. Es polida la cultura occitana millenària !
    Signat lo director-conservator-administrator-ieufautot d’un autre establiment que vòl gardar l’anonimat e qu’a solide pas res de veire amb lo Dirçoc.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *