L’Ostal d’Occitània de Tolosa dobrirà « La Puta d’Òc »

23 avril 2014  Economia

La Puta d'Òc

En temps de crisi, es conegut, cal diversificar son activitat. Divergéncia Occitana, l’associacion dissociativa d’associacions occitanas en carga de l’Ostal d’Occitània a Tolosa, z’a plan comprés, e perpausarà tre lo mes que ven una activitat novèla e puslèu inedicha dins lo luòc emblematic de la Vila Ròsa, qu’aurà jamai tant meritat son chafre.

Es un fach istoric que Malcosinat foguèt altres còps una carrièra frequentada per las prostituidas e lors praticas. D’aquò gardèt una marrida reputacion (e son nom), una sornura generala, e una flaira fòrta lo ser vengut. D’aqueste punt de vista l’iniciativa de Divergéncia Occitana s’inscriu en plen dins la socializacion de la lenga e la recuperacion del patrimòni istoric de Tolosa per sos estatjants. E l’eficacitat de l’associacion quora s’agís de recuperacion es pas pus a demostrar.

Es doncas pro logicament qu’un projècte d’amenatjament del trepador davant Malcosinat espeliguèt, per traire mai de monde a l’Ostal, generar de fons pròpris e dinamizar lo quartièr.

Joan-Francés Basfons, president de Divergéncia Occitana, es estrambordat pel projècte, qu’arriba, segon el, al bon moment : « Fa partida del plan de reorganizacion general de l’Ostal d’Occitània. Las (nombrosas) associacions demissonàrias de Divergéncia nos daissan suls braces de locals, qu’amenatjarem per poder aculhir las salariadas (e los salariats, defendèm la diversitat cap e tot!) dins las melhoras condicions possiblas. »

Lo projècte es tanben nascut d’una collaboracion transfrontalièra dins l’encastre de l’eurò-region e sostengut fòrtament per Catalonha. D’efièch, i aurà un escambi de prestataris entre Occitània e Catalonha e son las arpentairas de la Jonquera e de las rotas de l’Alt Empordà que vendràn usar lor sabatons sul trepador de la carrièra Malcosinat. Un bon calcul per Catalonha, que capitarà aital de desengorjar sos accès en desgorjant los tolosencs.

« Non es un projècte sens cap d’interés, a totis los nivèls. Primièr, culturalament, perque sèm la civilizacion de l’Amor, que podèm e devèm declinar jos totas sas formas. Puèi, economicament, perque Occitània non es en capacitat actualament de generar pro de profièch per se tirar lo cuol de las romecs. Urosament, Catalonha a un vertadièr pes economic e un saber-far tecnic en matièra de prostitucion, es normal qu’Occitània ne profitèsse. » nos indiquèt Marçal Gingòla, portièr de l’Ostal e portaire del projècte.

Ara, Divergéncia lancèt un rampèl als benevòls occitanistas per la segonda part de l’acòrd d’escambi amb Catalonha e Joan-Francés Basfons coma Marçal Gingòla an ja anonciat que serián del viatge :

« Segur qu’anam participar ! Avèm totjorn fonccionat la man dins la man amb los catalans, serà l’ocasion de nosar de relacions mai estrèchas encara ! » nos fisèron los sosteneires de la « Puta d’Òc ».

2 Responses to L’Ostal d’Occitània de Tolosa dobrirà « La Puta d’Òc »

  1. cocorda mascarada says:

    Aqueste jornal es fòrça mal informat, lo Gingòla foguèt constrench de se fa passar per Director de l’Ostal d’Occitània al prèp d’un Consorcium toristic andorran per s’emportar lo mercat, e es estat bravament trucat d’aver degut mentir un còp de mai, n’es encara tot trebolat

  2. jOmO says:

    Fòrça plan ! Petat d’arríser !!!

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *