Lo CFPO de Besièrs experimenta un « percors verbal »

27 avril 2014  Ensenhament, Espòrt

Pompas

Lo centre de formacion besierenc a desvolopat un novèl biais d’ensenhar la lenga.

Es una experiéncia pedagogica inedita : dins lo pargue de l’ostal de la vida associativa, lo CFPO de Besièrs a installat un percors d’un tipe particular : sul modèl dels percors santat, 15 talhièrs ritmaràn lo progression ; mas cada talhièr combina activitat fisica e estudi d’un punt de conjugason.

Se declina en doas categorias en fonccion de la dificultat : nivèl A1 o nivèl B2 del cadre europèu. Avèm interrogat Dominica Terròl, professor al CFPO.

Manaset : Nos podètz explicar la tòca d’aquel percors ?
Dominica Terròl : Òc, es una aplicacion de la pedagogia activa mesa en òbra pel CFPO. Los aprenents son actors de lor aprendissatge. Coma preconizat per la pedagogia accionala, parlon per agir e agisson per parlar. Es a dire qu’an a cada etapa una activitat fisica qu’es aligada amb un exercici de conjugason.

Manaset : e aquò foncciona ?
Dominica Terròl : Sèm a la debuta de l’experimentacion, mas avèm remarcat que la combinason d’exercicis d’assopliment e de conjugason facilita la memorizacion.

Manaset : Permet de recrutar un public novèl ?
Dominica Terròl : Òc, perque n’i a que venon al CFPO per la lenga, mas d’autres ara vendràn pel costat remesa en forma e convivialitat de l’aspecte esportiu.

Manaset : De partenariats a venir ?
Dominica Terròl : Òc, anam dintrar dins lo programa d’entrainament de l’equipa occitana de fotbal, que de lacunas en conjugason son estadas relevadas. Puèi aurem una mission de formacion contunha per los animators radio, los cantaires, los jornalistas de Manaset

Manaset : I a besonh d’una visita medicala ?
Dominica Terròl : Non que los exercices tant fisiques coma gramaticals son dins una progression calculada en partenariat amb de medecins e de linguïstes. L’escalfament es progressiu e i a pas de riscas, cadun pòt participar.

Manaset : Qual es lo ròtle del professor ?
Dominica Terròl : Cap, que los aprenents son en autonomia. Ne profietam per anar beure lo cafè.

Manaset : Avètz d’autres projèctes ?
Dominica Terròl : Òc, una formacion sonada Gimtonic que coplarà de moviments de gimnastica ritmica amb d’exercices sus l’accent tonic en occitan.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *