Los EGM, la solucion a las epidemias

29 avril 2014  Sciéncia, Societat

EGM

Fa de milierats d’annadas que las epidèmias, de la pèsta a Ebola en passant per la gripa A, pausan problèma a l’umanitat. Mas de cercaires de l’institut Sonmanta an trobat una solucion miracla a aquel flagèl.

« Aquela descobèrta cambiarà la fàcia de l’umanitat », çò declarèt Ivon Ranchièr, director de l’Institut Sonmanta, a l’escasença d’una conferéncia de premsa. « Los Enfants Geneticament Modificats (EGM) permetràn de se desbarrassar a jamai de las malautiás ».

Après d’annadas de recèrcas, la còla de recèrca de l’institut a capitat de modificar lo patrimòni genetic de fètus. Lor an ajustat un gèn que lor permet de fabricar lors pròpris adjuvants immunologics e, atal, de combatre los virusses abans que los posquen infectar.

« Los enfants SON470 seràn protegits contra totes los virusses. Sèm ja a trabalhar sus de novèlas modificacions geneticas que permetrián de lutar del meteis biais contra los micròbis e las bacterias », çò anoncièt Ivon Ranchièr.

D’unes detractors an criticat aquel projècte, en disent que los efièits secondaris del gèn utilizat son pas plan coneguts. Mas l’institut Sonmanto a denegat totas las teorias segon las qualas los EGM poirián patir esterilitat, apnèa del som, esquizofrenia, alcoolisme o Darwin Awards.

La polemica es lançada. E los opausants dels SON470 dison aver descobèrt qu’aquelas modificacions geneticas se poirián transmetre per contacte fisic. Mas los govèrns asseguran, eles, qu’an menat totas las experiéncias necessàrias per èstre solides que l’arribada de la generacion EGM dins las escòlas seriá sens risca pel demai de la populacion.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *