« Anem Òc », cinquena sason

3 mai 2014  Cultura

Anem Òc

La cinquena sason de « Anem Òc », lo fulheton que conta l’organizacion de manifestacions per la lenga occitana, acaba d’èstre rodada. Manaset vos desvela en exclusivitat las peripecias de la novèla edicion.

Totes los occitans an pas mancat un sol episòdi de la sason 4 de « Anem Òc », qu’aviá vist la partença de la KELFO e del Febrilitge de la coordinacion centrala per menar una batèsta sens pietat en favor de manifestacions multiplas. Après una guèrra acarnida, la coalicion per un luòc unic aviá ganhat la guèrra e la manifestacion s’èra debanada sens quasi pas cap d’efusion de sang.

La sason 5, o vos podèm ja anonciar, serà mai violenta. Tre lo primièr episòdi, la coordinacion prepausa un tractat de patz als organismes que l’an quitat, e aqueles lo refusan. Comença alara la guèrra mai sagnosa de l’istòria manifestacionista occitana. L’EIO manda ambassadors per impausar sa causida d’un luòc unic. La KELFO contra-ataca violentament e recampa son armada per defendre la posicion d’una accion coordonada. Lo Partit Excitant, el, geta d’òli sul fuòc en apelant a la mobilizacion.

Atacas a mans armadas, atemptats, perseguidas, aquela novèla sason lesina pas suls efièits especials… Telespectators fisèls, seretz pas decebuts !

One Response to « Anem Òc », cinquena sason

  1. Maria Joana Verny says:

    Sètz genials, coma de costuma ! òsca !

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *