Un kit de descopatge regional dins la revista Papagai crèa la polemica

2 mai 2014  Cultura, Politica

Regions de França a descopar

Auriá poscut èstre un trabalh manual coma tantes son perpausats dins las revistas pels pichons, mas lo kit de descopatge regional destacable en paginas centralas del darrièr Papagai lancèt un debat acarnassit. En causa : l’intervencion a l’esconduda del govèrnament francés…

Se presenta jos la forma d’una mapa de França, pro simpla, acompanhada de qualquas consinhas amassadas jol títol « Farga tas pròpias regions ! ». Convida de fach los pichons a descopar (amb l’ajuda d’un adulte, segur) França segon de regions qu’auràn dessenhadas aperabans, puèi eventualament a las coloriar e a las mandar a la redaccion de la revista.

Una òbra qu’incita a la creativitat, doncas, e ne sortisson cada mes dins lo magazina, mas aqui quicòm truquèt. Es l’Ententa dels Sòcis des Legidors d’Imprimats pels Pichons, una association parentala, que comencèt d’alertar sus çò qu’èra en trin de se passar.

« Çò estranh es que dins las consignas ressorgissián de mots qu’èran un pauc complicats, aquò parlava de  »processus de decentralisacion », de  »mila-fuèlhas territorial ». Per una revista destinada als 4-8 ans, èra segur de mal comprene ! » nos indiquèt un representent de l’E.S.L.I.P.

Intrigats, menèron doncas una pichona enquista, qu’aguèt de resultas incrediblas : lo govèrn francés auriá comandat, e quitament subvencionat aqueste encart !

Lo cabinet de Manuel Valls, lo primièr ministre francés, interrogat per Manaset, refusèt de s’exprimir sus aquesta polemica. Pasmens capitèrem de jónher una font de Matinhon que nos comuniquèt qualquas informacions jol cobèrt de l’anonimat :

« Nos cal far lèu una granda talha mas, crisi obliga, podèm pas pagar tot un comitat cargat d’organisar un descopatge senat, e aquò’s sens parlar de totas las pressions regionalistas que patissèm sus aquesta question. En mai, coma nos en fotèm un pauc, foguèt decidit de crompar a pauc de fraisses aquestes encarts dins totas las revistas per la joventut publicadas en lengas regionalas. Francament, far far aqueste descopatge a un comitat d’expèrts eissit de la direccion nacionala del Partit Socialista o a un dròlle de 4 ans, nivèl resulta es parièr, a la diferéncia que còsta plan mens car ! E al mens los regionalistas pòdon pas gular vist que son lors dròlles que son responsables ! »

Nòstre interlocutor foguèt çaquelà plan mens verbiós quora abordèrem la resulta d’aquesta campanha descriada e refusèt d’explicar perque, suls primièrs projèctes arribats al Ministèri, lo descopatge implicava una reorganizacion geografica totala del territòri francés. Una indiscrecion jornalistica nos menèt a veire que la region Bretanha seriá per exemple desplaçada per far un pont cap a Corsega que quitariá d’èstre una iscla. L’Iscla de França, al contre, ne vendriá una vertadièra, ara situida en Polinesia. Es pas segur qu’aquel redescopatge còste mens car a l’Estat…

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *