Lo D’OC Show qui vien qu’averà per tematica la sexualitat

14 mai 2014  Cultura

D'OC show

Si lo lòc e la data de l’enregistrament deu D’OC Show qui vien e son, com a l’acostumat, tienuts tòp secrets per OC Tele, la cadena de television occitana qu’a acceptat de’n desvelar la tematica a Manaset : la sexualitat deus occitans.

« Après lo viatge e la santat, la tematica de la sexualitat qu’èra la seguida logica », çò expliquèt Valentin Stéphane, cap-realizator de OC Tele. « Qu’ei un subjècte transgeneracionau qui pertòca tan los mainats deus collègis Calandreta o publics com los vielhs hens los ostaus de retirada ».

Hens lo dirècte qui vien, lo presentator Vincenç Craneria que harà doncas lo torn de las practicas sexuaus en Occitània, deu « Vò ! Vò ! » provençau au « Quiòc ! Quiòc ! » gascon en passant peu « Òc ! Òc ! » lengadocian.

Que serà invitat, solide, lo Med’òc de Montpelhièr, purmèra vila francesa peu la consomacion de sextoys (0,52 sextoys venuts per estatjants en 2013). Que i aurà invitats mei letrats com Florian Vernet, autor deu Petit lexic deu sèxe en occitan, Daniel Loddo qui a realizat lo disque « Cançons pebradas » o enqüera lo director de la Puta d’òc.

Que i aurà tanben invitats anonims especialistas deu subjècte o qui an practicas originaus. Las rumors que parlan d’un cantaire de polifonias, d’ua professora d’universitat e d’un chancaire landés que Manaset, dab l’arrespècte de la vita privada qui la caracteriza, ne’n dirà pas lo nom.

Rendètz-vos donc tau D’OC Show qui vien tà’n saber mei sus l’amor a l’occitana.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *