Caça al Tamarro tragica a Premian (34)

21 mai 2014  Societat

Accident de veitura

Après una serada plan assagada, una simpla caça al Tamarro s’acabèt d’un biais tragic.

A la fin d’un repais del comitat de las fèstas la dimenjada del primièr de mai,  los joves del vilatge de Premian decidiguèron d’organizar una caça al Tamarro. Coma se fa de costuma, lo mai niais dels participants foguèt menat, saca en man, dins un valat luènh de las abitacions per esperar lo Tamarro que los autres, armats de bròcs, devián rabatre. E tota la còla dintrèt acabar las cantinas de cartagena. Aital, doblidèron lo paure Gerald.

Las cantinas acabadas, S. D . , un dels participants, prenguèt sa veitura per tornar dins sa bòria bastida en defòra del vilatge. Perdèt lo contraròtle de son veïcul e laurèt cent mèstres de valat abans de s’arrestar contra un pontilh.

Lo bilanç d’aquesta caça es pesuc : doas còstas copadas per S. D., un permis de menar annulat, une veitura inutilizabla e una fluxion de peitrina per Gerald que trapèron al matin endormit dins son valat, la saca vuèja. E coma o ditz sa maire, lo pièger foguèt evitat :  se foguèsson trapats sus la meteissa rota …

Lo conselh municipal envisatja de prene un arrestat per interdire la caça al Tamarro de nuèit.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *