Montpelhièr : Faràn de lòtjaments estudiants amb los TER tròp largs

23 mai 2014  Economia

TER

La Comuna de Montpelhièr a prepausat de tornar crompar a la SNCF los TER tròp largs per ne far de ciutats universitàrias.

Benlèu que Montpelhièr salvarà la SNCF del ridicule total. D’efièit l’entrepresa a crompat detzenats de ramas de TER que se son averadas tròp largas per passar dins d’unas garas. Fin finala, seràn convertidas en lòtjaments pels estudiants.

« Resolvrà dos problèmas d’un còp », çò expliquèt Philippe Saurel, conse de Montpelhièr, a l’escasença d’una conferéncia de premsa. « La crisi del lòtjament truca fòrt dins nòstra vila, estant qu’avèm un fum d’estudiants. Lor poirem atal prepausar una petita abitacion a bas prètz en periferia de la vila ».

Cada compartiment serà transformat en estudiò, e cada wagon aurà sos comuns. La docha serà installada dins çò qu’èra lo local a bicicletas, e los mai astrucs auràn a mai accès a un wagon-restaurant.

Utilizar mejan de transpòrts per se lotjar es pas una novetat a Montpelhièr. Èran qualques-unes a logar de batèls l’annada e nombroses èran los que dormissián dins lors veituras. Aqueles seràn plan uroses de variar un pauc lo païsatge e de profitar del confòrt dels sètis SNCF per dormir melhor.

La Comuna, ela, compta logar los estudiòs a 450 euros lo mes e prevei d’amortir lèu los centenats de milions d’euros que serián estats perduts per la SNCF sens aquela idèa d’engèni.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *