Eleccions europèas : las leiçons de tirar de l’escrutin de dimenge

26 mai 2014  Politica

Eleccion

Manaset a obtengut en exclusivitat una entrevista del sénher Lapalma, responsable de comunicacion al Partit Socialista per parlar de las consequéncias del resultat a las eleccions europèas sus l’accion del govèrn.

Manaset : Lo resultat de l’escrutin confirma lo de las eleccions municipalas. Qué comptatz faire ?
S. L. : Avèm plan ausit lo messatge dels Franceses. Anam téner compte de lor opinion.

Manaset : Cossí ?
S. L. :  En contunhant de menar la meteissa politica amb las meteissas personas !

Manaset : Pensatz de faire un gèst en direccion dels electors del Front Nacional ?
S. L. : Òc. Lo govèrn va prepausar lèu un arrestat per interdire d’espandir las fardas a las fenèstras dins lo territòri tot. Podèm pas daissar lo terrèn de la lucha contra las fardas als balcons dins las solas mans del FN.

Manaset : Mas aquò concernís pas qu’una realitat francésa, e mai locala, non ?
S. L. : Non pas. L’escrutin a mostrat que los electors n’an un confle de veire estrings, camisas e bralhas penjar per carrièras. E aquò dins Europa tota. Los elegits socialistas francés a Estrasborg se batràn per que, enluòc, se pòsca pas pus veire aquò.

Manaset : E per la politica economica ?
S. L. : Me faretz pas daissar de costat la preocupacion principala dels franceses. Aprèp las fardas, interdirem tanben de brandussar lo tapisses, de bassacar las escobas a las fenèstras.

Manaset : Envisajatz una sortida possibla de l’euro ?
S. L. : Òc, de segur, anam tanben luchar contra las dejeccions caninas dins totes los países de la zona euro.

Manaset : E per l’armonizacion de la proteccion sociala entre los estats membres ?
S. L. : Benlèu qu’anam negociar amb totes los partenaris d’espandir aquò a las petas de gats.

Manaset : Avètz pas paur qu’aquò afortigue encara lo Front Nacional ?
S. L. : Non, non, lo messatge es clar, las gents espèran del president e de son primièr ministre un signe fòrt. Flaquirem pas. La nòstra linha es clara : pas de fardas als balcons, pas de fèmsas de gosses pels trepadors, es aital que farem barratge a la dreita extrema.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *