Lo MOOC de breton d’Edubreizh saturat après las resultas de las europèas

27 mai 2014  Monde, Politica

MOOC d'Edubreizh

Après l’anóncia de las resultas de las eleccions europèas, numeroses occitans an planificat de s’exiliar dins la circonscripcion Oèst ont lo FN es arribat sonque second. Per çò far, vòlon aprene lo breton.

« Foguèt una marèa d’inscripcions que nos arribèron dins la nuèit de dimenge a diluns », çò conta Gaël Harwen, responsable web a Edubreizh. « Nos calguèt tampar lo site per evitar que lo servidor tombèsse ». D’efièit, après las resultas de l’escrutin, una granda part dels occitans an decidit d’aprene lo breton.

Bretanha se tròba dins una de las raras circonscripcions francesas ont lo Front Nacional es arribat sonque second a las eleccions europèas. Es doncas venguda un modèla de tolerància e d’obèrtura d’esperit que fa pantaissar los occitans, negats dins la marèa blava marina.

Per se preparar a l’exilh, la solucion melhora lor pareguèt d’aprene lo breton mercés al MOOC d’Edubreizh que se debanarà del 9 de junh al 12 de julhet. « Aprenetz lo B.A.BA de la lenga bretona », çò ditz l’associacion per atirar los clients.

Mas ara, a pas pus besonh de publicitat. Dimars de matin, Edubreizh a tornat dobrir las inscripcions après aver installat son site sus un servidor mai potent. Es ara lo site parla.cat que rescontra de problèmas, benlèu perque la possibilitat d’una Catalonha independenta e antifascista fa ela tanben somiar los estatjants d’Occitània.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *