Quin ligam entre pòrt de blòda e aprendissatge de la lectura ?

2 juin 2014  Ensenhament, Sciéncia

Blòda

En posant dins son experiéncia personala, lo conse de Besièrs Robert Ménard a fait lo ligam entre lo fait de portar una blòda e la capacitat a apréner a legir.

Après lo metòde global e lo metòde alfabetic, es un novèl biais d’aprene a legir que ven d’èstre mes al punt a Besièrs. D’efièit, lo conse Robert Ménard es convençut que lo fait de portar una blòda permet als enfants de legir melhor. Manaset a enquistat dins lo passat de l’òme per compréner melhor las originas d’aquela teoria.

L’enfància del jove Robèrt es pas totjorn estada agradiva. Son paire aviá de grandas ambicions per el. Ne voliá far un militar. Per aquela rason, refusèt pendent tota son enfància de li crompar de blòdas. D’efièit, trobava aquel vestit tròp femenin e disiá que semblar una drolleta èra pas indicat per un futur oficièr.

A la fin de son annada de CP, Robèrt se mainèt que totes los autres mainatges de sa classa avián aprés a legir. Mas el, capitava totjorn pas de balhar de sens a las seguidas de letras que li mostrava lo regent. Coma se podiá preveire, ne tirèt la conclusion qu’èra en causa de l’interdiccion de son paire, e que l’accès a la lectura èra condicionat per lo pòrt d’una blòda. Fin finala, capitèt d’apréner a legir al cap de qualques annadas en cargant d’amagat una blòda raubada.

Un cinquantenat d’annadas mai tard, Robert Ménard a decidit de balhar lo meteis astre als enfants de sa ciutat, e de permetre a totes de beneficiar d’aquel metòde revolucionari. Un benfait que sos electors ne lo mercejaràn segurament.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *