Lo « patés del Medòc » es mai que viu

10 juin 2014  Lenga

Le patois médocain n’est pas mort

Un estudiant sòci del Medòc reagís a un article del jornal Sud Ouest que qualifica son parlar de « patés quasi completament desaparegut ».

Aquesta setmana, lo quotidian Sud Ouest publiquèt un article per parlar un còp de mai la vivacitat de la lenga gascona : « Le patois médocain n’est pas mort ». Avèm encontrat un estudiant montpelhierenc que ten a reagir. Militant associatiu puslèu prudent, lo nòstre jove a tengut a conservar son anonimat. Nos explica :

« Soi escandalizat de veire la desinformacion e las incoeréncias qu’abondon dins los articles de la premsa regionala a prepaus de l’occitan. Dins aqueste article son presentats corses de patés medocian seguits per mond d’un atge puslèu avançat dins lo ròdol de Bordèu.

Tot primièr, aurián degut venir dins una universitat per veire qu’al Medòc i a fòrça joves que parlan la lenga, e tòrni pas sus l’emplec del mot patois. Enmai definisson lo nòstre parlat coma una varianta de l’occitan gascon. Quina aberracion ! Aquò’s una mespresa de la diversitat panoccitana que braceja l’associacion tan a Bordèu coma a Montpelhièr e dins d’autras universitats encara. Per rectificar, podriam puslèu presentar lo parlar medocian coma un lengadocian oriental, pron estandarizat e influençat pels parlats de totes los membres aderents presents als acamps. Mas parli aquí de çò que coneissi, del Medòc de Montpelhièr. me vòli pas avançar per las autras seccions de l’associacion.

E una darrièra causa. I a bruches que dison que lo Medòc es pas tan viu coma abans… Bon, benlèu, mas d’aquí a titolar son article aital… Non, sèm pas mòrts ! Vos convidi a passar bèure un còp a una acampada nòstra e veiretz cossí tornam pensar lo mond amb de vin d’Aude. »

Urosament, rés es jamai tot negatiu : « Soi çaquelà plan susprés de descobrir d’ancians membres del medòc tant vièlhs. Aviái totjorn pensat que l’associacion s’èra fondada i a un quinzenat d’annadas. », se regaudís lo medoquian.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *