La reintroduccion de hippies alpencs en Arièja contestada

2 juillet 2014  Societat

Hippies

En Arièja, lo plan de reintroduccion dels hippies prepausat pel Ministèri de l’ecologia soslèva de polemicas.

Foguèt un temps qu’Arièja èra a la punta per l’installacion sul sèu territòri de hippies, peluts e autres pelhandrauds. Mas aquesta populacion simpatica aitant qu’econòma en aiga vielhiguèt, e, dempuèi las annadas 70 demesiguèt de mai dels ¾, çò diguèt la darrièra enquista de l’Observatòri de la Neò-Ruralitat. Per sauvar l’espècia dins aqueste element salvatge que li es favorable, lo Ministèri de l’ecologia lancèt un plan de reintroduccion, atacat de totas parts.

Es mai que mai dins los Alps que son anats quèrre un escapolon d’individus aptes a la reproduccion dins un autre territòri. Nos sovenèm sens mal de la polemica que prenguèt gaireben una amplor nacionala quora foguèron anonciadas las chifras del plan de captura dels hippies alpencs. Aviá de fach necessitat la mesa en plaça d’un Festenal de las Arts de Carrièra a Gap, per fin de poder atraire tota la populacion de siroal vestida, una depensa un pauc tròp bèla pels adversaris de la reintroduccion que regretavan una tala despensa en temps de crisi.

De mai, la còla d’engenhaires cargats de trabalhar sus de trapèlas non-letalas per capturar vius los bons individús depassèt lèu son budgècte, notadament en escas e atraches divèrses, que devián totes èsser biò. Una malconeissença iniciala de l’espècia sorça de trufandisas dins lo mitan scientific, e que ralentiguèt plan lo projècte. Fin finala, calguèt gaireben un an per capturar un bon centenat de hippies, e un an de mai per los aprivadar e los empachar d’alucar en permanéncia de bastons de fuòc dins lors gàbias.

En Arièja, es la populacion locala que menèt la batèsta contra la reintroduccion d’una espècia que jutja nociva e invasiva per çò qu’es pas endemica. Es reprochat als hippies de saquejar los camps de colzà a la sason dels amors, de s’atacar als tropèls de motons per cardar la lana, de panar las confituras dins las bòrias…

Segon David Orle, de l’ONR, aquesta polemica « a pas luòc d’èsser. Existís una forma de reget e de xenofobia latenta basada sus d’esteròtipes en çò dels agricultors ariegeses, mas cal pas oblidar qu’en bona part foguèron autres còps, eles tanben, de hippies. »

Vishnó Bergonhós, agricultor en Arièja, mena la batèsta dempuèi la debuta. Regreta una « manca de concertacion amb la populacion locala e una abséncia de presa en compte de las riscas engendradas per la reintroduccion. » Damandèt dins una letra al President de la Republica la mesa en plaça d’un fons d’indemnisacion pels degalhs potencialament causats pels novèls hippies ariegeses. Apuèjat per una part de la comunautat scientifica, senhala que l’espècia de hippie ariegés tradicional es ben diferenta d’aquela que se fa dins los Alps, e que la reintroduccion risca plan de patir un revèrs.

Cranh enfin qu’aquò se passe fòrça mal amb los ariegeses de pura soca : « Un jorn, i aurà un accident, basta qu’un caçaire del canton se tròbe agressat per un cèrcle de picaires de tam-tam dins sa granja a 4 oras del matin, e decide sus un còp de cap de prene son fusilh… »

Nos podrem pas empachar de far lo parallèl amb Losèra, ont la reintroduccion de hippies temptada dins las annadas 70 faguèt fracàs sus aquesta mena de desamor entre los autoctòns e los novelament installats, e que menèt lo departament a èsser lo mens poblat de França.

2 Responses to La reintroduccion de hippies alpencs en Arièja contestada

  1. Felip Martèl says:

    Lo zippie de las Aups es un zippie montanhol. Vol dire que per viure normalament, li chal una environa de MONTANHAS. Dins Pireneus, l’i a pas de montanhas vertadieras -quauques colas bassas, o de darbonieras ridiculas, faiçon terril dau Pas de Calais. Gardarem nostres zippies de Gap !

  2. Lois dau Lemosin says:

    Franchament, los hippies vertadiers, los mai braves, lo smai coneguts, son pas dins totas quelas montanhas ponchudas ! Non ! Ilhs son dins las montanhas a hippies ! (o a vachas) (o a brebitz tanben) : montanha lemosina, causse dau Larzac e autres pais vivarés !
    Mas podetz prener los hippies aupencs, nos nos gardem los nòstres. Vòstras orsas sirian fotudas de se gorniflar coma ilhs.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *