Desfís facebook : i a una vertadièra banalizacion del dangièr

16 juin 2014  Societat

Castelnau d'Ari

A Castelnau d’Ari, un jove inconscient s’es encara daissat anar a un desfís facebook sens se rendre compte del dangièr : el e son amiga an degut èsser espitalizats a Carcassona.

Fòrça monde ara an ausit parlar dels desfís facebook. Aprèp « neknomination » qu’encoratjava a se filmar a beure de begudas fortament alcoolizadas e « à l’eau ou au restau », un desfís novèl met en dangièr los joines occitans inscrits sus facebook. Se ditz « afartadís » e se cal filmar a manjar la mai gròssa quantitat possible de l’especialitat locala.

Ièr passat dins Aude, lo jòc virèt al drame. Dins la nuèit que seguiguèt la participacion de Laurenç S. al desfís, sa companha se planhèt de mal de cap, racavòmit, vertiges, incoordinacion e difficultats respiratòrias. Puèi lo joine òme foguèt victima el meteis de simptomas identics.  Los pompièrs arribats sus plaça detectèron una intoxicacion grèva al gas metan. Los dos joves son encara en observacion.

Enric Tastalon, lòctenent de gendarmariá, nos fisa : « Es pas lo primièr còp que nos es signalat un incident similar. Los joves se creson dins un jòc e se pensan invencibles. O prenon per rire. Quitament d’adults fan aquò, mentre que los vièlhs coneissián plan los dangièrs, e aurián pas jamais dormit dins una cambra fenèstras barradas aprèp l’absorbsion de cassolet, amai en quantitats anormalas. Sèm inquiets de l’ample que pren aquel jòc dins nòstre canton. »

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *