Desfacha Soissa fàcia a la França : Felip Martèl n’explica las rasons

23 juin 2014  Espòrt

Estadi

Lo grand sociològ occitan torna sus lo match de divendres.

Se la màger part dels comentators esportius laudifican los blaus per la qualitat de lor jòc, semblariá que sián passats completament a costat de la realitat. Felip Martèl nos balha las vertadièras claus d’aquesta desfacha.

Felip Martèl : « la vertadièra rason de la desfacha de Soissa es lingüistica, coma gaireben totjorn. D’efièit, aquel país es plurilingüe. Trobam dins l’equipa nacionala de jogaires de lenga francesa, italiana, alemanda e romancha. Los jogaires, per comunicar entre eles, son religats a un centre universitari de traduccion instantanèa, situat a Bern, per d’aurelhetas minusculas. Aqueste centre recep la demanda d’un jogaire dins sa lenga, ne fa la revirada, e transmet dins las quatre lengas del país successivament e aleatoriament (lei federala de 1998 impulsada per referendum popular). Aquò explica lo manca de coordinacion dins la defensa fàcia a las atacas de Giroud, Matuidi, Valbuena, Benzema e Sissoko. Dins un país coma lo nòstre, aquò risca pas d’arribar que lo francés es lenga de la republica.

Lo meteis problèma arribèt a Espanha que los jogaires parlavan castilhan, basc, catalan, galician e andalou. Lo match contre Chile foguèt compromés pel temps d’intercomprehension e lo refus dels Catalans e dels Bascs de recebre d’instruccions en castilhan.
La sola Belgica se’n sortiguèt malgrat son bilingüisme d’estat, e encara perque cap de jogaire flamenc integrèt l’equipa per protestar contre lo colonialisme wallon.

La còla occitana de foot fariá ben de téner compte d’aquestas desfachas e de se metre sul pic a la practica assidua del Vivarés Alpin per tener un dialecte comun sul terren. »

One Response to Desfacha Soissa fàcia a la França : Felip Martèl n’explica las rasons

  1. Felip Martèl says:

    De tot biais, lo vivaro aupenc en essent lo dialecte lo mai pur de las lengas d’oc, es pas solament au foot que lo chal utilizar, mas pertot. E sa parentat estrecha amb lo romanch permet una negociacion mai aisiaa amb los banquiers dels Grisons, que, coma la charn dau meme nom, son puslèu secs dins los raports umans. Chau puèi pas eissubliar que se los Soisses son pas bons au foot, question fric, per contra…

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *