Los intermitents menaçan de tornar far la Santo Estello

26 juin 2014  Non classé

Santo Estello

Per protestar contra la reforma del regime d’intermiténcia, los manifestants brandissan una novèla menaça : tornaràn organizar una seconda Santo Estello.

Es la panica a l’Elisèu. Se las perturbacions del festenal Rio Loco de Tolosa, o encara la risca d’anullacion del festenal d’Avinhon, avián pas capitat a far plegar lo govèrn a prepaus de la reforma del lor caumatge, los intermitents son pas jamai estats tan près de capitar.

D’efièit, passan a la velocitat superiora. Un pòrta-paraula del movement de protestacion adrecèt ièr un messatge : se lo regime d’intermiténcia es pas tornat examinar, los intermitents tornaràn organizar una Santo Estello a Aigas-Mortas.

Las letras de protestacion an fusat après aquela anóncia. « Nos calguèt jà suportar a la debuta del mes las conferéncias pesugas, los omenatges variats e las inauguracions de placas. Nos pòdon pas tornar far viure aquó ! », çò testimonia una estatjanta d’Aigas-Mòrtas. D’efièit, la comuna aguèt jà a patir de las animacions de la fèsta annadièra felibrenca del 6 al 10 de junh passats.

Lo pòrta-paraulas dels intermitents explica el : « Lo calendièr servís plan nòstra causa. Es ongan lo centenari de la mòrt de Mistral, e lo public es al limit d’èstre saturat dels omenatges e conferéncias istoricas variats organizats dempuèi genièr. Solide qu’una seconda Santo Estello provocariá l’explosion ».

Lo govèrn, fàcia a aquela manòbra suspresa, a decidit d’encontrar los intermitents per tornar obrir las negociacions.

Fòto : Tele Mistral

One Response to Los intermitents menaçan de tornar far la Santo Estello

  1. Le muge says:

    Los aperòs i rescontrèron ça que la una brava capitada. Tot es pas encara ganhat pels intermitents.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *