Platanas malautas entre Cap Estanh e Besièrs : la solucion

23 juillet 2014  Sciéncia, Societat

Eolianas al bòrd del Canal

Voies Navigables de France va experimentar una solucion novèla per remplaçar las platanas malautas, solucion que mescla ecologia e manten del païsatge.

Aprèp un molon d’estudis per trapar una solucion a la disparicion de las platanas bordant lo Canal de las Doas Mars, l’entrepresa Big Malhum, de Capestanh, prepausa quiquòm de nòu.

Implantariá en alternància d’eolianas e de panèus fotovoltaics. Avantatge, pas de risca de malautiá e un apòrt financièr per VNF que permetriá de manténer los obratges long del Canal. Los toristas interrogats son pas desfavorables al projècte, que las eolianas fan ara partida integranta del païsatge de Lengadòc Bas. Los pescaires, eles, son mai reservats.

« Imaginatz-vos pescar a l’ombra d’una eoliana, çò ditz Marcèl, un acostumat de la pèsca del costat de Polhes, seriatz bronzat coma un zèbre, sens comptar lo bruch qu’es desagradiu per far prangièra. Es una idèa de tecnocrat. »

Un adepte del torisme fluvial, Hans Peter, nos fisa : « Ieu, me derenga pas. Lo Canal foguèt, en son temps, factor de progres tecnic, e se trapèt segurament mai d’un protector de l’environament de l’epòca per protestar contra l’ataca a l’integritat de son espaci de vida. Es totjorn aital quand òm mena la modernitat. Cal plan avançar. »

Una enquista publica es dobèrta a la comuna de Cap Estanh. Podètz anar balhar lo vòstre vejaire.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *