Tres a cantar, un reviscòl umanitari

5 août 2014  Cultura

Tres a cantar

Lo grop Tres a cantar es a se reviscolar. Après sièis ans de silenci, tornan dins la mira de far cambiar las causas.

Auretz sens dobte remarcat que coneissèm ongan un estiu marcat per de precipitacions abondosas e frequentas que fan lo bonaür dels païsans e autres vendeires de parapluèjas. Mas aqueste còp, vos caldrà pas cercar d’explicacions del costat de Sant Medard ni de Sant Bernabèu mas puslèu dins lo reviscòl recent de la joiosa còla de cantaires roergats « Tres a cantar ».

Aquestes tres companhs escaissats de las onomatopèas evocatritz de « Pean, Punk, Plouc » (ndlr prononciar Pinh, Pònc, Ploc) nos avián dejà assegurats un estiu pro « banhat » l’annada de la sortida de lor albom (2007), òbra que s’acabava per un enregistrament de mai de 40 mn d’aigaci…

Fòrts d’aquesta reputacion, los Tres a cantar, demorats muts pendent sièis ans, foguèron contactats per la Comunautat de Comunas del País Vernés (Dordonha) per tornar metre en aigas lo polit lac de Nòufonts que foguèt voidat e curat pendent l’ivèrn. D’efièch, aqueste estanh que s’espandís sus mantuns ectaras e acuèlha una basa de léser e de torisme es mai qu’important per l’economia locala. Es aquí que lo grop tornarà sus l’empont del festenal aqüatic « P… ! L’ai renversada ! » al mièg d’agost.

Mas sembla que l’aventura s’arrestarà pas aquí e una virada del grop dins lo Sahèl es d’ara endavant prevista per l’annada que ven. Un afar de seguir…

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *