Lo pintaball, lo novèl espòrt que fa furor

25 août 2014  Espòrt

Pintaball

Inventat dins Tarn e Garona, aquel novèl espòrt es a s’exportar dins Occitània tota.

Quand a lançat aquel novèl espòrt, Olivièr Marnon, un estatjant inventiu de Nègrapelissa, pensava pas qu’auriá tant de succès. Lo principi n’es simple : es lo meteis que lo del paintball, mas la pintura es remplaçada per de vin.

« Nòstra region produsís fòrça vin qu’agrada pas tròp al monde que lo bevon, mas qu’a la proprietat de plan mascarar lo teissut », çò explica Olivièr Marnon. A doncas agut l’idèa de remplaçar las bilhas de pintura per de bilhas de vin. Dobriguèt son terrenh e lèu, recebèt un fum de jogaires atirats per aquel mescladís de modernitat e de patrimòni.

Lo mes passat, un second pintaball dobriguèt a Masamet, dins Tarn, e un tresen es a se montar a Muret en Garona Nauta. Dins aqueste, se poiràn utilizar mantunas qualitats de vin per de tarifas diferentas : AOC, vrac, medalhat… E serà prepausat a la còla ganhanta de vuejar lo demai de las municions de la còla perdanta.

Aquel espòrt a pas acabat de far parlar d’el, e es en bona plaça per remplaçar lo rugbí coma espòrt nacional d’Occitània.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *