Un centre de vacanças pels ordenadors

27 août 2014  Economia, Societat

Ordenadors

Un novèl centre de vacanças obriguèt en junh passat a La Ciotat. Aculhís un public un pauc especial : los ordenadors que lors utilizators son partits en vacanças.

Per sa primièra annada, lo centre d’acuèlh 101111000 a conegut una polida capitada. « Avèm recebut mai de cent pensionaris suls dos meses », çò conta Felix Grandet, director de l’establiment. Après los gats e los gosses, son los ordenadors que pòdon trobar un luòc d’acuèlh per s’anutjar pas quand lors mèstres se’n van en vacanças.

Lo principi es simple. Un vintenat d’animators e de benevòles prenon suènh de las maquinas cada jorn : s’ocupan de las mesas a jorn, passan l’antivirus, fan qualques podcasts per que los mèstres trapen las maquinas plan en forma a lor retorn.

« Avèm pas agut de problèmas per trobar d’animators volontaris », çò testimònia Felix Grandet. D’efièit, a montat un partenariat amb los Ordenadolics Anonimes. Un vintenat de jovents se son inscriuts, per poder evitar de passar de vacanças en familha dins un ostalon de montanha sens cap de wifi.

Lo centre es a soscar per l’an que ven a espandir son ofèrta a las tabletas e als esmartphones.

Fòto Pablo Ruiz Múzquiz

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *