Los eiretièrs de Loïs Alibert pòrtan lo planh contra cinc acadèmias de la lenga occitana

1 septembre 2014  Lenga, Non classé, Societat

Tribunal

A la seguida d’un article paregut en cò d’un concurrent nòstre, los descendents de Loïs Alibert, l’autor del diccionari referent de l’occitan estandard, pòrtan lo planh per arcelament sexual e viòl en reünion.

Es un article del lingüiste plan conegut D.S. que lancèt l’afar, o puslèu la frasa de l’article en question : « Tota “acadèmia” que se lança dins una violacion d’Alibèrt e del CLO s’autoexclutz del trabalh seriós. »

Praquò, per lo mot francés « viol », los diccionaris Rei Bethveder, Laux, Per Nòste e Faure balhan per revirada « viòl », mentre que Faure, CREO Provença e Laux balhan tanben « violament ».

Malastrosament, lo diccionari CREO Provença balha tanben per revirada d’aquel mot « violacion ».

E es d’aquí que venguèt lo problèma. Un descendent d’Alibèrt tombèt dins la trapèla coneguda que consistís dins l’utilizacion d’un sol diccionari e comprenguèt la frasa incriminada de travèrs. Decidiguèt doncas de portar l’afar davant un tribunal, considerant que digús podiá pas violar Alibèrt, foguèsse viu o mòrt. Los consèlhs lingüistics de totas las acadèmias concernidas s’emplegan a rectificar la mespresa abans que de mesas en examen sián pronónciadas.

E prometon aqueste còp que van trabalhar seriosament a la sortida del Diccionari Unenc de la Lenga Occitana per evitar que de faits coma aicèstes se renovelèsson.

Fòto : Jules78120

One Response to Los eiretièrs de Loïs Alibert pòrtan lo planh contra cinc acadèmias de la lenga occitana

  1. Domergue Sumien says:

    Excellent! 😀

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *