Perigüers que va dobrir un musèu novèl consacrat a l’art modèrn

30 mars 2015  Cultura

Pincèls secs

Es l’estiu que ven que la comuna de Perigüers dobrirà lo musèu Pèire Sancris dins l’ostal Meredieu en plen centre de la ciutat.

Aquel pintre mondialament conegut ven de faire una donacion de cinquanta telas seunas eissudas de sa colleccion dita « pincèl sec ». Nos’n explica lo concèpte.

Manaset : Cossí definir aquela forma picturala ?
P.S. : Ai començat coma totes per faire de pintura figurativa. Puèi ai explorat l’univers del monocròme : jaune, verd, blu e enfin blanc. Mas tot èra estat dit dins aquestes domenis. Un jorn, ai aguda l’idèa de pintrar amb un pincèl sec. A la vista del resultat, ai comprés qu’aviái trapada ma via.

Manaset : Sus qui supòrt ?
P.S. : soi un pintre mai que tradicionaliste. Ai plan faitas unas recèrcas sus pel de lèbre, pel de lapin e quitament papièr plastic. Mas fin finala, es sus tela que lo rendut final me sembla melhor.

Manaset : Mas cossí veire quicòm sus una tela ont i a res dessús ?
P.S. : detrompatz-vos ! Aquelas telas son pas verges ! Lo pincèl sec, en passant dessús , i a daissat la memòria del traçat, e se dintratz dins mon univèrs, veiretz la tela s’animar. Es fòrça mai viu qu’una pintura tradicionala que la forma n’es fixada un còp per totes.

Manaset : Avètz ja expausat ?
P.S. : Òc, de segur, dins mai d’un musèa en França, Georges Pompidor, Musèu de Ceret, Musèa d’Art modèrne de Labastida Esparbairenca. Mas tanben a l’estrangièr, Nòva Iòrc, Beijin, Pragas …

Manaset : Avètz  faita una donacion a la vòstra vila de naissença de cinquanta telas. Aquò representa una soma bèla ?
P.S. : Òc, representa a la valor del mercat mai que mai 2 500 000 euros. Mas per ieu, l’essencial es de permetre a la vila de Perigüers de se posicionar coma una dels luòcs màgers de l’art contemporanèu.

Manaset : Pensatz que lo public local vendràn ?
P.S. : Òc, que los Peiregordins son a la punta de l’actualitat artistica dempuèi Cros Manhon, e mai abans benlèu. Farem pas que perpetuar la tradicion. Amai farem venir dins la nòstra vila d’amators d’art del mond entièr.

Manaset : Avètz pas paur que d’autres vos imitèsson ?
P.S. : A non pas ! Soi sol a mestrejar perfietament la tecnica del pincèl sec. Una tela al pincèl sec qu’es pas mieuna abusarà pas una seconda un expèrt. Amb un pauc de costuma, lo quite grand public s’enganarà pas tanpauc a condicion de verificar menimosament.

Manaset : Quora es prevista la dobertura?
P.S. :
Normalament, lo 21 d’agost de 2015, se las òbras son acabadas.

Fòto : Kandance

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *