Lo darrier film de l’estudiò Ghibli será adaptat de Marcela Delpastre

19 septembre 2014  Cultura

Studio Ghibli

Còp sus còp, en mens d’un an, l’anoncia de l’arrest per l’estudiò d’animacion japones Ghibli de la produccion de long-metratges e aquela de la retirada de son fondator e realisator emblematic, Hayao Miyazaki, aviá creat la suspresa chas los fans. Una autra e ultima suspresa ven d’esser anonciada : l’estudiò preparariá, avant la fin de sas activitats cinematograficas, una liura adaptacion dau Tombeau des Ancêtres, de Marcela Delpastre.

Malaisat de pas veire darrier aquela chausida la pauta daus ancians mestres de l’estudiò, Hayao Miyazaki e Isao Takahata, tots dos oficialament retirats. E se ni l’un ni l’autre serán efectivament a la realizacion, an admes dins la prensa aver pausat las basas scenaristicas dau project e lo supervisar de la debuta a la fin.

De fach, Miyazaki e Takahata fugueren totjorn tots dos passionats de çò que se passava en França, e quo es per asard, dau temps de vacanças en Lemosin, que tomberen sus las poesias de Marcela Delpastre. Leu i troberen daus ressons familiers d’elements de la cultura japonesa e de lur pròpia cultura.

« Ai conegut dins ma jòunessa un Japon rurau, d’una espòca ente l’òme sabiá quala era sa justa plaça dins la natura e lo respect que n’en deviá tirar. La societat tradicionala japonesa era pregondament animista, çò que permetiá a l’òme e a las chausas naturalas de coexistar. Quand ai descubert l’òbra de Marcela Delpastre, ai vist l’estonanta similaritat que l’i podiá aver entre nòstres dos pòples e entre aquelas doas societats » nos fiset M. Miyazaki. Lo realisator de Princessa Mononoke e dau Chasteu dins lo ciau será per alhors l’illustrator de la cuberta dau prupchen libre de Tibaut Cheisson-Tanaka, Dau Totoro au Tamarró, un estudi comparat sus lo folclòre daus dos pais.

Coma a lur abituda, los dos mestres laisseren ren a l’asard e solliciteren l’ajuda dau legatari universau de Marcela Delpastre, Jan dau Melhau, per esser segurs de respectar son òbra. Interrojat per corrier per Manaset, Jan dau Melhau se desclaret enchantat per l’umilitat e l’inteligencia daus japones :

« Sem tombats d’acòrd sus lo contengut, e mai sus lo scenariò, pro rapidament. Pòde desjà anonciar que quand lur perpausí de far crebar tots los personatges, aquò lur plaguet tot plen. »

La comunautat de fans dau films de Ghibli en Lemosin deu donc esperar emb impaciencia la surtida de queu noveu film de l’estudiò, que saurá, sens dobte possible, li far tirar las lagremas daus uelhs.

Un darrier còp.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *