L’idèa d’una V giganta en occitania per demandar lo vòte d’una lei fa son camin

14 septembre 2014  Lenga

Via Catalana

A la seguida de la manifestacion bèla de Barcelona lo 11 de setembre, lo Comitat Anem Òc se tornèt acampar.

Portat per lo vam de la diada catalana, los membres del Comitat decidiguèron de veire se se podiá imitar los germans catalans e metre en plaça una V giganta per demandar lo vòte d’una lei per l’occitan.

L’acamp se tenguèt l’endeman de la diada dins un luòc amagat. Primièr, caliá decidir d’una vila. Los felibres volián Marselha, los Gascons, Pau e los Lengadocians èran partejats entre Tolosa e Montpelhièr. Los Nòrd Occitans se ploravan que digús volriá pas jamai montar al nòrd de Montalban. Amai d’unes disián Paris qu’una V a partir de l’Arc de Triomf fariá polit.

Coma lo luòc pausava problèma, se parlèt de la forma. L’idèa de la V catalana agradava, mas unes diguèron que per èsser comprés par la màger part, caliá una B coma « Boulèm Boutar » puslèu que la V de « Volèm Votar » que los que legisson pas l’occitan comprendrián pas.

Lo president de la confederacion Calandreta ajustèt : « Cal metre l’accent sul segondari, qu’es vertadièrament sinistrat, que l’ensenhament public es incapable de respondre a la demanda ! ». Al moment que los bearneses de Libertat quitavan la sala als crits de « Eleccion, trepet a cons ! », de partisans de las grafias alibertina e mistralenca començavan d’escàmbiar trucs e patacs a la seguida d’una garrolha lingüistica.

Descorats, los dos membres del comitat que demoravan a la taula decidiguèron de reportar la reunion sine die.

One Response to L’idèa d’una V giganta en occitania per demandar lo vòte d’una lei fa son camin

  1. jOmO says:

    M’atz tuat. Tròp bon !

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *