Lo Jacques Chirac intoxicat per pomada lemosina

1 octobre 2014  Monde, Politica

Jacques Chirac

L’òmi de 81 ans n’a pas briga cambiat los sons gosts despuish la soa campanha dab lo RPR de 1995 simbolizada per ua poma. Mes adara que s’i hè shens caishaus e que minja e beu tot a la palha. Çò qui n’ei pas shens risca.

La retirada qu’auhereish, a còps, maishantas suspresas aus e a las qui ne deishan pas de víver dens lo lor passat estosse plapat d’aur o de pèth de castanha. L’ancian President de la Republica Francesa que’n sap quauquarren adara. Per manca de dents qu’ei obligat de deishar las pomas au profieit de la pomada e qu’estó estat intoxicat ger mentre que’s shuquèsse un pinton de pomada fresca originària de la Pomaderia Janty (Coresa).

N’avem pas enqüèra nat detalh sus la natura deu poson qui provoquè un esvaniment deu vielh òmi. Dens lo son malur que hasó un culhevet sus l’acobdader dret deu son fautulh e que cadó cap en dabant dens ua montanha de pèças jauna de 20 centimes.

Urosament, alertada peus crits deus guits qui seguivan l’ahar dab engüeish, Bernadeta que trobè lo son marit pro vist entà desgatjar las raras pèças de 10c qui èran blocadas dens lo nas de l’ex-President. Puish qu’aperè los pompiers.

Ua òra arron l’accident, Manuel Valls que convoquè la premsa entà condamnar un acte terroriste a l’encontre de la Republica Francesa e qu’arcastè los hèits a la pomaderia basca “qui ei tostemps aus mans de l’organizacion ETA. […] qu’ac sabem, qu’an deishat las armas mes pas l’alcòl.”çò digó lo purmèr ministre esmaliciat.

Duas òra après qu’aprenevam l’arestacion de 13 productors de pomada basca e un Breton qui tirava au fusilh de caça sus las pomas de la soa pomèra entà’n tirar lo shuc.

Aqueth matin la lutz qu’estó hèita sus l’origina de la pomada autant com deu malaisèr deu Jacques Chirac: Lo contraròtle a l’alcotest qu’amuishè un tau d’alcolemia de 2,4g/L de sang. La pomeria Janty ne deisha pas de costat la possibilitat de portar lo clam per maishanta publicitat.

Ahar de seguir.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *