Lo tribunal de Lemotges condemna Manaset

6 octobre 2014  Cultura

Justícia

Manaset es estat condemnat pel tribunal de Lemotges lo 2 d’octobre per discriminacion, a la seguida d’un planh de la federacion regionala de la Liura Pensada.

A la demanda d’un collectiu de liures pensaires, lo tribunal d’instància de Lemotges a examinat lo cas de Manaset. Lo planh èra estat portat per un collectiu de liures pensaires per discriminacion umoristica. « La lenga de la Republica es lo francés, çò diguèt lo jutge, e es pas possible de reservar lo rire per una categoria de ciutadans que parlarián una lenga autra. En consequéncia, l’organa de desinaformacion Manaset es condemnat a faire rire lo collectiu planhent. »

A la demanda de la justícia, los jornalistas de Manaset recebràn doncas los liures pensaires planhents dins un relambi d’un mes e los deuràn faire rire. Davant l’amplor del pretzfait, Manaset a decidit de faire apèl a sos legeires. Se qualqu’un coneis un mejan per faire rire un pissa-freg de la Liura Pensada, son vejaire serà plan vengut. Malgrat son engenh reconegut per totes, l’equipa de Manaset se declara incompetenta e sas capacitats umoristicas despassadas. A decidit çaquelà, amb lo coratge que li coneissètz, de contunhar de vos far rire en lenga nòstra maldespièch de las pressions liurapensadièras.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *