Nabilla: “Lo Reformisme qu’ei arribat a las soas limitas istoricas”

15 octobre 2014  Politica

Nabilla

La filosòfa soïsso-savoiana que s’ei longament esprimida au parat d’ua conferéncia sus las coneishenças actuaus en paleoantropologia.

Dissabte passat, a Genèva, los qui vienèvan escotar lo devis d’Edgar Morin suu procediment d’ominisacion dens l’Istòria qu’estón susprés de véder tanben ua figura emblematica de la tele-realitat: Nabilla Benattia.

Dens un purmèr temps Nabilla qu’ei tornada sus la plaça de las hemnas dens las purmèras societats umanas abans d’analisar la situacion actuau. “Las nostas societats occidentaus que son malaudas…qu’avem la tecnologia mes sociaument qu’èm en retard de cap tà las societats ditas tradicionaus o primitivas“.

Que contunhè dab analisis e punts de vista sus l’aviéner politic d’Euròpa. “Ne poderam pas sortir de la crisi actuau en emparà’s un sistèmi injuste, ierarquisat e escusèr.” En respóner a ua question d’un jornaliste francés de “Valeurs Actuelles” la Nabilla, shens arromerar, que mosquejè en quauquas frasas la politica actuau deu Govèrn Valls, lo liberalisme sauvatge atau com lo centralisme d’Estat “qui ei de har càder au mei viste” segon era.

Tà n’acabar, que responó a la premsa poeple presenta tanben a perpaus de la sortida de la soa navèra marca de vestit: ABC, A Bas le Consumérisme. Que cau díser que lo son purmèr quessòt suu quau podem léger “Les Socdems? Allô quoi!” portat aqueth dia per la filosòfa-manequina que s’ei dejà venut a mei de 1 000 exemplaris.

Devath los aplaudiments d’un public en quasi totalitat mascle, Nabilla qu’anonciè tanben entrar dens ua tempora de recèrca sus la “sociologia de la coloracion deus peus ençò de la hemna occidentau”.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *