ÒC tele que lança lo « Babel show »

25 octobre 2014  Cultura

D'ÒC Show

Après la mesclanha de lengas dens lo son darrèr D’ÒC Show, la cadena de television per internet qu’a decidit d’aviar ua navèra emission en dirècte : lo Babel Show.

« Qu’ei tostemps un problèma tà trobar convidats qui parlen la lenga e qui sian en relacion dab la tematica abordada », çò explica Valentin Estève, encargat de produccion d’ÒCtele. « Si volem parlar de cultura o d’ensenhament, que va, mes taus autes subjèctes, que mancam d’intervienents ». En efèit, que semblaré los occitanofònes qu’ajan centres d’interès pauc diversificats.

Qu’ei lo darrèr D’ÒC Show, filmat diluns passat a l’escòla de comèrci de Pau, qui balhè la solucion au monde de la produccion. Un deus convidats, qui ne podèva pas parlar la lenga nosta, que s’exprimí en castelhan. « E fin finala, n’estó pas hèra mau compres peu public », çò conta Valentin Estève. « Los occitanofònes que comprenen pro plan totas las lengas latinas. E los non-occitanofònes, eths, ne veden pas briga la diferéncia ».

Lo D’ÒC Show que serà doncas arremplaçat per ua navèra emission, lo Babel Show, dens la quau los convidats qui’n mestrejan pas l’occitan e’s poderan exprimir dens quau lenga romanica que sia. L’emission qui vien, qui serà enregistrada au mes de noveme, que’s harà a Craiova, en Romania. Que s’i parlarà d’ortada, e que seràn convidats un òmi politic espanhòl, un prèste latinofòne deu Vatican e un pairin còrse.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *